કર્ણાટક કોંગ્રેસમાં આંતરિક ખેંચતાણનો અંત આવતો દેખાતો નથી. મુખ્યમંત્રી ડી.કે. શિવકુમારે તાજેતરમાં વરિષ્ઠ નેતા રામલિંગા રેડ્ડી સાથેનો વિવાદ ઉકેલાઈ ગયો હોવાનો દાવો કર્યો હતો, પરંતુ તેના થોડા જ દિવસોમાં પક્ષની અંદરનો અસંતોષ ફરી સપાટી પર આવ્યો છે. ખાતાઓની ફાળવણીથી નારાજ બે વરિષ્ઠ નેતાઓ હાઇકમાન્ડ સમક્ષ પોતાની રજૂઆત કરવા દિલ્હી પહોંચ્યા છે.
આ નેતાઓમાં બેંગલુરુ વિકાસ મંત્રી ક્રિષ્ના બાયરે ગૌડા અને કોંગ્રેસના ધારાસભ્ય રિઝવાન અર્શદનો સમાવેશ થાય છે. નોંધનીય છે કે મંત્રીપદ મળ્યા છતાં ક્રિષ્ના બાયરે ગૌડાએ હજુ સુધી સત્તાવાર રીતે પોતાના વિભાગનો ચાર્જ સંભાળ્યો નથી.
વધુ સત્તા માટે ક્રિષ્ના બાયરે ગૌડાનું દબાણ
પક્ષના સૂત્રોના જણાવ્યા મુજબ, ક્રિષ્ના બાયરે ગૌડા ઈચ્છે છે કે બેંગલુરુ ડેવલપમેન્ટ ઓથોરિટી (BDA) અને બેંગલુરુ મેટ્રોપોલિટન રિજન ડેવલપમેન્ટ ઓથોરિટી (BMRDA) જેવી મહત્ત્વની સંસ્થાઓ તેમના મંત્રાલય હેઠળ જ રહે. તેમનું માનવું છે કે શહેરના આયોજન અને વિકાસમાં મુખ્ય ભૂમિકા ભજવતી આ સંસ્થાઓ વિના તેમના મંત્રાલયની અસરકારકતા મર્યાદિત બની જશે.
તેમની દિલ્હી મુલાકાતને કારણે રાજ્ય સરકાર દ્વારા તાજેતરમાં જાહેર કરાયેલા ખાતાઓની ફાળવણીમાં ફેરફાર થવાની અટકળોએ જોર પકડ્યું છે.
મંત્રીપદની આશાએ રિઝવાન અર્શદ પણ દિલ્હીમાં
બીજી તરફ કોંગ્રેસના ધારાસભ્ય રિઝવાન અર્શદ પણ કેબિનેટમાં સ્થાન મેળવવા માટે દિલ્હી પહોંચી ગયા છે. એક તરફ વર્તમાન મંત્રીઓ વધુ સત્તાની માંગ કરી રહ્યા છે, તો બીજી તરફ કેટલાક ધારાસભ્યો મંત્રીપદ માટે પ્રયાસો કરી રહ્યા છે. આ પરિસ્થિતિ દર્શાવે છે કે સરકારની રચના બાદ પણ અસંતોષ હજુ યથાવત્ છે.
મુખ્યમંત્રી શિવકુમાર માટે સરકારમાં સંતુલન જાળવવું અને અસંતુષ્ટ નેતાઓને મનાવવું હવે વધુ પડકારજનક બનતું જઈ રહ્યું છે.
રામલિંગા રેડ્ડીનો વિવાદ શાંત થતાં જ નવો વિખવાદ
આ નવી રાજકીય હલચલ એવા સમયે સામે આવી છે જ્યારે થોડા દિવસો પહેલાં જ વરિષ્ઠ નેતા રામલિંગા રેડ્ડી સાથેનો વિવાદ માંડ શાંત થયો હતો. રેડ્ડીએ અગાઉ મેજર અને મીડિયમ ઇરિગેશન વિભાગમાંથી રાજીનામું આપીને અસંતોષ વ્યક્ત કર્યો હતો.
તેમનો આક્ષેપ હતો કે સરકારની રચના પહેલાં તેમને બેંગલુરુ વિકાસ મંત્રાલય આપવાનું વચન આપવામાં આવ્યું હતું, પરંતુ બાદમાં આ વિભાગ ક્રિષ્ના બાયરે ગૌડાને સોંપવામાં આવ્યો હતો. આ મુદ્દો શિવકુમાર સરકાર માટે પ્રથમ મોટો રાજકીય પડકાર બની ગયો હતો.
શિવકુમારે કહ્યું હતું – ‘આ પરિવારનો આંતરિક મામલો’
ડી.કે. શિવકુમાર અને રામલિંગા રેડ્ડી વચ્ચે લાંબી બેઠક બાદ વિવાદનો અંત આવ્યો હોવાનું જાહેર કરવામાં આવ્યું હતું. બેઠક બાદ શિવકુમારે જણાવ્યું હતું કે તમામ મતભેદો દૂર થઈ ગયા છે અને રાજીનામાનો મુદ્દો હવે પૂર્ણ થઈ ગયો છે.
તેમણે આ સમગ્ર ઘટનાને કોંગ્રેસ પરિવારનો આંતરિક મામલો ગણાવ્યો હતો, જ્યારે રામલિંગા રેડ્ડીએ પણ સમાધાનની વાતને સમર્થન આપ્યું હતું.
જોકે, હવે અન્ય નેતાઓ દ્વારા દિલ્હીમાં હાઇકમાન્ડનો દરવાજો ખખડાવવામાં આવી રહ્યો હોવાથી સ્પષ્ટ થાય છે કે કર્ણાટક કોંગ્રેસમાં અસંતોષ હજુ સંપૂર્ણપણે સમાપ્ત થયો નથી. આગામી દિવસોમાં નેતાઓની અપેક્ષાઓ સંતોષવી અને સરકારમાં રાજકીય સંતુલન જાળવવું કોંગ્રેસ હાઇકમાન્ડ માટે સૌથી મોટો પડકાર બની શકે છે.
Leave a Reply