મુંબઈના દાદર સ્ટેશનનું નામ ‘ચૈત્યભૂમિ’ રાખવાના નિર્ણય સામે વિરોધ, મહારાષ્ટ્રમાં રાજકીય વિવાદ વકર્યો

મહારાષ્ટ્ર સરકાર દ્વારા મુંબઈના દાદર રેલવે સ્ટેશનનું નામ બદલીને ‘ચૈત્યભૂમિ’ રાખવાની જાહેરાત બાદ રાજ્યમાં રાજકીય વિવાદ ઊભો થયો છે. મુખ્યમંત્રી દેવેન્દ્ર ફડણવીસે 18 નવેમ્બરે જાહેરાત કરી હતી કે આગામી વિધાનસભા સત્ર દરમિયાન નામ બદલવાની પ્રક્રિયા પૂર્ણ કરવામાં આવશે. જોકે, મહારાષ્ટ્ર નવનિર્માણ સેના (MNS)ના કોર્પોરેટર યશવંત કિલ્લેદારે આ નિર્ણયનો વિરોધ કર્યો છે.
કિલ્લેદારે આક્ષેપ કર્યો છે કે દાદર સ્ટેશનનું નામ બદલતા પહેલાં સ્થાનિક રહેવાસીઓને વિશ્વાસમાં લેવામાં આવ્યા નથી. તેમના મતે, સ્થાનિક લોકોની લાગણીઓ અને ઓળખને અવગણીને આ નિર્ણય લેવામાં આવી રહ્યો છે. તેમણે સરકારને સ્થાનિક નાગરિકો સાથે ચર્ચા કરવા અને જરૂર પડે તો સર્વે કરાવવાની માંગ કરી છે.
વધુમાં, કિલ્લેદારે જણાવ્યું છે કે રેલવે સ્ટેશનનું નામ બદલવાની સત્તા કેન્દ્ર સરકારના રેલવે મંત્રાલય પાસે છે. આ મુદ્દે તેઓ વડાપ્રધાન નરેન્દ્ર મોદી અને કેન્દ્રીય રેલવે મંત્રીને પત્ર લખીને સ્થાનિક લોકોની લાગણીઓથી વાકેફ કરાવશે.
ઉલ્લેખનીય છે કે દાદર રેલવે સ્ટેશનની શરૂઆત 1853માં ‘માહિમ રોડ’ તરીકે થઈ હતી. હાલમાં આ સ્ટેશન મુંબઈની સેન્ટ્રલ અને વેસ્ટર્ન રેલવે લાઇનને જોડતું મહત્ત્વપૂર્ણ કેન્દ્ર છે અને અહીં કુલ 14 પ્લેટફોર્મ છે.
બીજી તરફ, 6 ડિસેમ્બરે યોજાનારા મહાપરિનિર્વાણ દિનની તૈયારીઓ અંગેની બેઠકમાં મુખ્યમંત્રી ફડણવીસે જણાવ્યું હતું કે દાદર સ્ટેશનનું નામ ‘ચૈત્યભૂમિ’ રાખવાની માંગણીને રાજ્ય સરકારે સૈદ્ધાંતિક મંજૂરી આપી દીધી છે અને કેન્દ્ર સરકારને પણ જાણ કરવામાં આવી છે. આગામી વિધાનસભા સત્રમાં જરૂરી ઔપચારિકતાઓ પૂર્ણ કરવાની તૈયારી છે. હવે આ નિર્ણયને લઈને મહારાષ્ટ્રમાં રાજકીય ખેંચતાણ વધવાની શક્યતા છે.