ગુજરાતમાં સ્થાનિક સ્વરાજ્યની ચૂંટણી પહેલા જ રાજકીય તણાવ તેજ બન્યો છે. વડોદરા જિલ્લાના ડભોઈ તાલુકા પંચાયત કચેરીએ આજે ઉગ્ર હંગામો સર્જાયો હતો. સાઠોદ બેઠકના કોંગ્રેસ ઉમેદવારનું નામ પાછું ખેંચાવવા દબાણ કરવામાં આવ્યું હોવાના આરોપોને લઈને ધારાસભ્ય શૈલેષ મહેતા (સોટા) અને કોંગ્રેસ કાર્યકરો આમને-સામને આવી ગયા હતા.
શું બન્યું?
માહિતી મુજબ, સાઠોદ બેઠકના કોંગ્રેસ ઉમેદવાર અરવિંદભાઈ પાટણવાડિયાને ધમકી કે દબાણ દ્વારા ઉમેદવારી પરત ખેંચાવવા પ્રયત્ન થઈ રહ્યો હતો. આ અંગે જાણ થતાં જ કોંગ્રેસના સ્થાનિક નેતાઓ અને મોટી સંખ્યામાં ગ્રામજનો તાલુકા પંચાયત કચેરીએ પહોંચી ગયા હતા અને ભાજપ વિરુદ્ધ જોરદાર વિરોધ નોંધાવ્યો હતો.
ઝપાઝપી અને અફરાતફરી
પરિસ્થિતિ એટલી તંગ બની ગઈ કે અંદાજે 15-20 મિનિટ સુધી કચેરીમાં હંગામો અને ગભરાટનો માહોલ રહ્યો. ઉશ્કેરાયેલા કાર્યકરો અને ગ્રામજનોએ ધારાસભ્ય શૈલેષ સોટા અને તેમના પુત્ર સાથે ધક્કામુક્કી કરી હતી. બંને પક્ષો વચ્ચે સીધી અથડામણ સર્જાતા મામલો વધુ ગંભીર બન્યો.
પોલીસની દખલ
ઘટનાની જાણ થતા જ પોલીસ તાત્કાલિક સ્થળ પર પહોંચી ગઈ અને પરિસ્થિતિને કાબૂમાં લીધી. હાલ મામલે બંને પક્ષો સામે કાયદેસરની કાર્યવાહી કરવાની પ્રક્રિયા શરૂ કરવામાં આવી છે.
કોંગ્રેસના આક્ષેપ
કોંગ્રેસે આક્ષેપ કર્યો છે કે ભાજપ પોતાના ઉમેદવારોને બિનહરીફ બનાવવા માટે વિપક્ષને ડરાવી-ધમકાવી રહ્યું છે, જે લોકશાહી માટે નુકસાનકારક છે.
Leave a Reply