ગુજરાતમાં ચોમાસું સક્રિય: પારડીમાં 8.19 ઇંચ વરસાદ, દક્ષિણ ગુજરાતમાં સૌથી વધુ વરસાદ; રાજ્યનો ચોમાસાનો અહેવાલ જાહેર
0 
0 
અમદાવાદ, 21 જુલાઈ: ગુજરાતમાં ચોમાસું હવે જોર પકડી રહ્યું છે. રાજ્ય સરકાર દ્વારા જાહેર કરાયેલા સંકલિત ચોમાસા અહેવાલ મુજબ, અત્યાર સુધીમાં રાજ્યમાં સરેરાશ 261.59 મિમી (10.30 ઇંચ) એટલે કે મોસમી સરેરાશના 28.78 ટકા જેટલો વરસાદ નોંધાયો છે. છેલ્લા ત્રણ વર્ષના સરેરાશ વરસાદની સરખામણીએ ચાલુ વર્ષે જુલાઈના ત્રીજા સપ્તાહ સુધીમાં નોંધપાત્ર વરસાદ વરસ્યો છે.
દક્ષિણ ગુજરાતમાં સૌથી વધુ વરસાદ
વિસ્તારવાર વરસાદના આંકડા મુજબ દક્ષિણ ગુજરાતમાં સૌથી વધુ 43.36 ટકા વરસાદ નોંધાયો છે. અહીં સરેરાશ 1,542 મિમી સામે અત્યાર સુધીમાં 668.65 મિમી વરસાદ પડ્યો છે. જ્યારે સૌરાષ્ટ્રમાં 30.25 ટકા, પૂર્વ-મધ્ય ગુજરાતમાં 19.69 ટકા, ઉત્તર ગુજરાતમાં 14.66 ટકા અને કચ્છમાં સૌથી ઓછો 3.42 ટકા વરસાદ નોંધાયો છે.
રાજ્યના 251 તાલુકાઓમાંથી 16 તાલુકાઓમાં 1,000 મિમીથી વધુ, 22 તાલુકાઓમાં 501થી 1,000 મિમી, 42 તાલુકાઓમાં 251થી 500 મિમી અને 83 તાલુકાઓમાં 126થી 250 મિમી વરસાદ નોંધાયો છે.
છેલ્લા 24 કલાકમાં પારડીમાં સૌથી વધુ વરસાદ
છેલ્લા 24 કલાક દરમિયાન રાજ્યના 32 જિલ્લાનાં 165 તાલુકાઓમાં સરેરાશ 14.25 મિમી વરસાદ નોંધાયો હતો. સૌથી વધુ વરસાદ દક્ષિણ ગુજરાતમાં નોંધાયો, જેમાં મુખ્ય આંકડા આ પ્રમાણે છે:
- પારડી (વલસાડ) – 208 મિમી (8.19 ઇંચ)
- ખેરગામ (નવસારી) – 202 મિમી (7.95 ઇંચ)
- નાનાપોંઢા (વલસાડ) – 182 મિમી (7.17 ઇંચ)
- વાપી (વલસાડ) – 182 મિમી (7.17 ઇંચ)
- વલસાડ તાલુકો – 179 મિમી (7.05 ઇંચ)
મંગળવારે સવારે 6થી સાંજે 4 વાગ્યા સુધીના 10 કલાકમાં પણ નવસારી અને ડાંગ જિલ્લામાં ભારે વરસાદ યથાવત રહ્યો. વાંસદામાં 116 મિમી, ચિખલીમાં 99 મિમી, વઘઈમાં 86 મિમી, નવસારીમાં 81 મિમી અને ગણદેવીમાં 80 મિમી વરસાદ નોંધાયો.
નર્મદા ડેમ 67.77 ટકા ભરાયો
ભારે વરસાદને કારણે સરદાર સરોવર નર્મદા ડેમમાં પાણીની આવક સતત વધી રહી છે. હાલમાં ડેમ 67.77 ટકા ભરાયો છે અને તેમાં 226,402 MCFT પાણીનો સંગ્રહ છે. રાજ્યના અન્ય 206 જળાશયોમાં કુલ સંગ્રહ ક્ષમતાના 40.90 ટકા જેટલું પાણી ઉપલબ્ધ છે.
હાલમાં રાજ્યના 6 ડેમ સંપૂર્ણ ભરાઈ ચૂક્યા છે, જ્યારે 21 ડેમ 70થી 100 ટકા સુધી ભરાયેલા છે. કુલ 27 ડેમ માટે એલર્ટ જાહેર કરવામાં આવ્યું છે, જેમાં 12 ડેમ હાઈ એલર્ટ, 2 એલર્ટ અને 13 વોર્નિંગ પર રાખવામાં આવ્યા છે.
રાહત અને બચાવ કામગીરી તેજ
ભારે વરસાદને ધ્યાનમાં રાખીને રાજ્યમાં 11 NDRF ટીમો અને 24 SDRF પ્લેટૂન તૈનાત કરવામાં આવી છે. અત્યાર સુધીમાં 8,324 લોકોને સુરક્ષિત સ્થળે ખસેડવામાં આવ્યા છે, જ્યારે 3,711 લોકોનું રેસ્ક્યૂ કરવામાં આવ્યું છે.
વરસાદથી અસરગ્રસ્ત તમામ 3,402 ગામોમાં વીજ પુરવઠો પુનઃસ્થાપિત કરવામાં આવ્યો છે. જોકે ભારે વરસાદને કારણે રાજ્યમાં 224 રસ્તાઓ વાહનવ્યવહાર માટે બંધ છે, જેમાં સૌથી વધુ અસર વલસાડ અને નવસારી જિલ્લામાં જોવા મળી છે.
ખરીફ વાવેતરમાં તેજી
સારા વરસાદને કારણે ખેડૂતોમાં ખુશીનો માહોલ છે. રાજ્યમાં સામાન્ય 85.30 લાખ હેક્ટર સામે અત્યાર સુધીમાં 50.83 લાખ હેક્ટર (59.59 ટકા) વિસ્તારમાં ખરીફ પાકનું વાવેતર પૂર્ણ થયું છે. તેમાં કપાસ, મગફળી, સોયાબીન અને ડાંગરના પાકનું વાવેતર નોંધપાત્ર પ્રમાણમાં થયું છે.
આગામી દિવસોમાં પણ ભારે વરસાદની શક્યતા
ભારતીય હવામાન વિભાગ (IMD)એ આગામી દિવસોમાં દક્ષિણ ગુજરાત, ઉત્તર ગુજરાત તેમજ પંચમહાલ-અરવલ્લી પટ્ટાના વિસ્તારોમાં ભારેથી અતિભારે વરસાદની આગાહી કરી છે. સાથે જ 21થી 24 જુલાઈ દરમિયાન માછીમારોને દરિયો ન ખેડવાની કડક સૂચના આપવામાં આવી છે.
