સરકારે વચન પૂરું ન કર્યું તો ફરી આંદોલન કરાશે : સીજેપી
0 
0 
નવી દિલ્હી: NEET-UG પરીક્ષાને લઈને થયેલા આંદોલન દરમિયાન આત્મહત્યા કરનાર વિદ્યાર્થીઓના પરિવારોને વળતર આપવાના મુદ્દે સીજેપી (કોકરોચ જનતા પાર્ટી)એ કેન્દ્ર સરકાર સામે ફરી આંદોલનની ચેતવણી આપી છે. પાર્ટીના સ્થાપક અભિજિત દીપકે જણાવ્યું કે સરકારે આંદોલન સમાપ્ત કરાવવા માટે આપેલું એક-એક કરોડ રૂપિયાનું વળતર આપવાનું વચન હજુ સુધી અમલમાં મૂક્યું નથી.
અભિજિત દીપકે મીડિયા સાથે વાતચીતમાં કહ્યું કે સરકાર દ્વારા પીડિત પરિવારોને અત્યાર સુધી કોઈ આર્થિક સહાય આપવામાં આવી નથી. તેમણે આરોપ લગાવ્યો કે સરકાર પોતાના વચનોનું પાલન કરવામાં નિષ્ફળ રહી છે. જો વહેલી તકે વચન પૂર્ણ નહીં કરવામાં આવે તો સીજેપી ફરીથી દેશવ્યાપી આંદોલન શરૂ કરશે.
આ દરમિયાન જુલાઈમાં જંતર-મંતરથી સંસદ સુધીના વિરોધ પ્રદર્શન દરમિયાન નોંધાયેલી FIR અંગે સુપ્રીમ કોર્ટે મહત્વપૂર્ણ ટિપ્પણી કરી છે. કોર્ટે વિદ્યાર્થીઓ સામે નોંધાયેલી ફરિયાદો પાછી ખેંચવાનો નિર્ણય સંબંધિત રાજ્ય સરકારો પર છોડ્યો છે. જોકે હત્યા, બળાત્કાર જેવા ગંભીર ગુનાઓમાં સંડોવણી હોય તો આવી રાહત લાગુ નહીં પડે.
કેન્દ્ર સરકારે પણ સુપ્રીમ કોર્ટમાં રજૂઆત કરી છે કે પ્રદર્શન દરમિયાન વિદ્યાર્થીઓ સામે નોંધાયેલી સામાન્ય FIR રદ કરવાની દિશામાં તે સકારાત્મક વલણ ધરાવે છે.
