કિશ્તવાડના જંગલમાં બે SPOની ગોળી મારી હત્યા, ગુમ થયેલા પોલીસકર્મીઓના મૃતદેહ મળતાં ચકચાર
0 
0 
જમ્મુ-કાશ્મીરના કિશ્તવાડ જિલ્લામાં બે સ્પેશિયલ પોલીસ ઓફિસર (SPO)ની ગોળી મારીને હત્યા કરવામાં આવી હોવાની ઘટના સામે આવી છે. બુધવારથી ગુમ થયેલા બાબી ચંદ (57) અને રશપાલ કુમાર (45)ના મૃતદેહ ગુરુવારે દચ્છન વિસ્તારના જંગલમાંથી મળી આવ્યા હતા. બંનેના શરીર પર ગોળીઓનાં અનેક નિશાન જોવા મળ્યાં હતાં. જોકે, તેમની પાસેથી સરકારી હથિયારો મળી આવ્યાં નહોતાં.
મળતી માહિતી મુજબ, બંને પોલીસકર્મીઓ કિશ્તવાડના દચ્છન વિસ્તારમાં આવેલા કિયાર ગામમાં સ્પેશિયલ ઓપરેશન્સ ગ્રૂપ (SOG) સાથે ફરજ બજાવતા હતા. તેઓ પોતાના કેમ્પમાંથી ધરના-મરવાહ સ્થિત સેનાની ચોકી તરફ જઈ રહ્યા હતા. આ દરમિયાન અચાનક તેમનો સંપર્ક તૂટી ગયો હતો. તેમના મોબાઇલ ફોન પણ બંધ થઈ જતાં શોધખોળ શરૂ કરવામાં આવી હતી. ગુરુવારે બંનેના મૃતદેહ ગુમ થયેલા સ્થળથી આશરે બે કિલોમીટર દૂર જંગલમાંથી મળી આવ્યા હતા.
સુરક્ષા દળો દ્વારા સર્ચ ઓપરેશન તેજ
બંને પોલીસકર્મીઓની હત્યા પાછળ સંડોવાયેલા હુમલાખોરોને ઝડપી પાડવા માટે સુરક્ષા દળોએ કિશ્તવાડના પહાડી વિસ્તારો અને ગાઢ જંગલોમાં સઘન તપાસ શરૂ કરી છે. ભારતીય સેના, જમ્મુ-કાશ્મીર પોલીસની SOG ટીમ અને કેન્દ્રીય સુરક્ષા દળો આ અભિયાનમાં જોડાયાં છે. અગાઉ ગુમ થયેલા પોલીસકર્મીઓની શોધખોળ માટે ડ્રોન અને સ્નિફર ડોગ્સની પણ મદદ લેવામાં આવી હતી.
કિશ્તવાડમાં આતંકવાદ વિરોધી કાર્યવાહી તેજ
કિશ્તવાડ જિલ્લો આતંકવાદ વિરોધી કામગીરીની દૃષ્ટિએ સંવેદનશીલ વિસ્તાર માનવામાં આવે છે. અહીં સુરક્ષા દળો દ્વારા સતત તપાસ અને સર્ચ ઓપરેશન હાથ ધરવામાં આવે છે. વર્ષ 2026 દરમિયાન આતંકવાદ સંબંધિત ઘટનાઓમાં અત્યાર સુધીમાં પાંચ લોકોનાં મોત થયાં હોવાનું જાણવા મળ્યું છે, જેમાં ચાર આતંકવાદીઓ અને એક સુરક્ષાકર્મીનો સમાવેશ થાય છે.
