અમદાવાદ મ્યુનિસિપલ કોર્પોરેશનમાં હવે AI કરશે કર્મચારીઓની કામગીરી પર નજર, ₹7 કરોડના ખર્ચે બનશે નવી સિસ્ટમ

અમદાવાદ મ્યુનિસિપલ કોર્પોરેશન દ્વારા કર્મચારીઓના સંચાલન માટે આર્ટિફિશિયલ ઇન્ટેલિજન્સ (AI) આધારિત નવી સિસ્ટમ તૈયાર કરવામાં આવી રહી છે. અંદાજે ₹7 કરોડના ખર્ચે વિકસાવવામાં આવનારી આ સિસ્ટમ કર્મચારીઓને કામ સોંપવાથી લઈને તેમની કામગીરીનું મૂલ્યાંકન કરવા સુધીની જવાબદારી સંભાળશે.
હાલમાં અમદાવાદ મ્યુનિસિપલ કોર્પોરેશનમાં કાયમી અને કોન્ટ્રાક્ટ પર મળીને આશરે 18થી 20 હજાર કર્મચારીઓ ફરજ બજાવે છે. નવી સિસ્ટમ દ્વારા કર્મચારીઓની હાજરી, કામગીરી, અનુભવ, સિનિયોરિટી અને કામ કરવાની ક્ષમતાની વિગતોનું ડિજિટલ સંચાલન કરવામાં આવશે. સાથે જ કયા કર્મચારીને કઈ જવાબદારી સોંપવી તે નક્કી કરવામાં પણ AI મદદ કરશે.
આ સિસ્ટમ કર્મચારીઓની કામગીરીના આધારે તેમનું મૂલ્યાંકન કરશે. તેના આધારે બઢતી, તાલીમ અને અન્ય વહીવટી નિર્ણયો લેવામાં અધિકારીઓને સૂચનો મળશે. આથી સારું કામ કરતા કર્મચારીઓને પ્રોત્સાહન મળશે અને બેદરકારી દાખવતા કર્મચારીઓની કામગીરી પર પણ નજર રાખી શકાશે.
ભવિષ્યમાં 50 હજાર કર્મચારીઓનું સંચાલન થશે
નવી સિસ્ટમ એવી રીતે તૈયાર કરવામાં આવશે કે ભવિષ્યમાં મ્યુનિસિપલ કોર્પોરેશનના 30 હજાર કાયમી અને 20 હજાર આઉટસોર્સ કર્મચારીઓ સહિત કુલ 50 હજાર કર્મચારીઓનું સંચાલન કરી શકાય.
નવી AI સિસ્ટમમાં મળશે આ સુવિધાઓ
- કર્મચારીઓની ડિજિટલ પ્રોફાઇલ: નિમણૂકથી લઈને નિવૃત્તિ સુધીની તમામ વિગતો એક જ જગ્યાએ ઉપલબ્ધ રહેશે.
- ઈ-સર્વિસ બુક: કર્મચારીઓના જૂના દસ્તાવેજો અને સર્વિસ રેકોર્ડ ડિજિટલ કરવામાં આવશે.
- ટાસ્ક મેનેજમેન્ટ: કર્મચારીઓની ક્ષમતા અને કામના ભારણ પ્રમાણે તેમને જવાબદારીઓ સોંપવામાં AI મદદ કરશે.
- કામગીરીનું મૂલ્યાંકન: કર્મચારીઓના કામના આધારે તેમની કામગીરી તપાસવામાં આવશે અને બઢતી તથા તાલીમ માટે સૂચનો આપવામાં આવશે.
અગાઉની AI યોજનાઓના અમલ સામે પણ સવાલ
મ્યુનિસિપલ કોર્પોરેશન દ્વારા અગાઉ ફરિયાદ નિવારણ માટેના CCRS પોર્ટલ અને રસ્તાના ખાડા ઓળખવા માટે AI આધારિત સિસ્ટમ શરૂ કરવાની વાત કરવામાં આવી હતી. આ સિસ્ટમ દ્વારા નાગરિકોની ફરિયાદોનું વિશ્લેષણ કરી સંબંધિત અધિકારીઓ સુધી પહોંચાડવાની યોજના હતી. જોકે, આ યોજનાઓનો વાસ્તવિક અમલ કેટલો થયો છે તે અંગે હજુ સ્પષ્ટ માહિતી સામે આવી નથી. હવે ₹7 કરોડની નવી AI સિસ્ટમ કેટલી અસરકારક સાબિત થાય છે તેના પર સૌની નજર રહેશે.