અધિકારીઓની સત્તા પર અંકુશ, વેપારીઓને મોટી રાહત; નોટિસ અને દંડના નિયમોમાં ફેરફાર
0 
0 
GST કાઉન્સિલની 57મી બેઠકમાં વેપારીઓ અને કરદાતાઓ માટે અનેક મહત્વના નિર્ણયો લેવામાં આવ્યા છે. કાઉન્સિલે GST અધિકારીઓની સીધી ધરપકડ કરવાની સત્તા મર્યાદિત કરવા, નાના ટેક્સ વિવાદોમાં રાહત આપવા અને વિવિધ વ્યવસાયિક ખર્ચ પર ઇનપુટ ટેક્સ ક્રેડિટ (ITC)નો લાભ આપવા સંબંધિત દરખાસ્તોને મંજૂરી આપી છે. આ ઉપરાંત ડિલિવરી સેવાઓ અને રિટ્રેડેડ ટ્રેક્ટર ટાયર પર GST દર ઘટાડવામાં આવ્યો છે.
GST અધિકારીઓ હવે સીધી ધરપકડ નહીં કરી શકે
GST કાઉન્સિલે અધિકારીઓ દ્વારા સીધી ધરપકડ કરવાની સત્તામાં ફેરફાર કરવાની દરખાસ્તને મંજૂરી આપી છે. સામાન્ય કર વિવાદોમાં હવે ટેક્સ અધિકારીઓ સીધી રીતે કોઈ વ્યક્તિની ધરપકડ કરી શકશે નહીં. ગંભીર ગુનાહિત કેસો અને જાણીજોઈને કરવામાં આવેલી મોટી ટેક્સ ચોરીના મામલામાં કાયદાકીય પ્રક્રિયા અને જરૂરી ન્યાયિક પ્રક્રિયાનું પાલન કરવું પડશે.
કર્મચારીઓના હેલ્થ અને લાઇફ ઇન્શ્યોરન્સ પર ITC
કંપનીઓને પોતાના કર્મચારીઓ માટે લેવાતા ગ્રૂપ હેલ્થ અને લાઇફ ઇન્શ્યોરન્સ પર ચૂકવાયેલા GST સામે ITCનો લાભ મળી શકે છે. આ નિર્ણયથી કર્મચારી કલ્યાણ પાછળ થતા કંપનીઓના ખર્ચમાં રાહત મળવાની શક્યતા છે.
ટેલિકોમ ટાવર અને બહારની પાઇપલાઇન પર પણ ITC
ટેલિકોમ ટાવર તેમજ ફેક્ટરી પરિસરની બહાર આવેલી પાઇપલાઇન માટે પણ ITCનો માર્ગ ખુલ્યો છે. આ નિર્ણયથી ટેલિકોમ, રિફાઇનિંગ, પેટ્રોકેમિકલ, ગેસ વિતરણ અને ઇન્ફ્રાસ્ટ્રક્ચર ક્ષેત્રને ફાયદો થવાની શક્યતા છે.
ડિલિવરી સેવાઓ પર GST 18%થી ઘટીને 5%
ડિલિવરી સેક્ટર માટે પણ મોટી રાહત આપવામાં આવી છે. અનરજિસ્ટર્ડ ડિલિવરી સર્વિસ પ્રોવાઇડર્સ દ્વારા આપવામાં આવતી સેવાઓ પર GST દર 18%થી ઘટાડીને 5% કરવાની મંજૂરી આપવામાં આવી છે. આથી નાના ડિલિવરી સર્વિસ પ્રોવાઇડર્સ તેમજ ઈ-કોમર્સ ક્ષેત્ર પરનો કરબોજ ઘટી શકે છે.
આઉટડોર કેટરિંગ પર ITCનો લાભ
પાત્રતા ધરાવતા વ્યવસાયોને આઉટડોર કેટરિંગ પાછળ ચૂકવવામાં આવતા GST સામે ITCનો લાભ આપવાનો નિર્ણય પણ લેવામાં આવ્યો છે. આથી કંપનીઓના ઇવેન્ટ્સ અને અન્ય વ્યવસાયિક કાર્યક્રમો પાછળ થતા કેટરિંગ ખર્ચમાં રાહત મળી શકે છે.
રિટ્રેડેડ ટ્રેક્ટર ટાયર પર માત્ર 5% GST
ખેતી ક્ષેત્ર માટે પણ મહત્વનો નિર્ણય લેવાયો છે. રિટ્રેડેડ ટ્રેક્ટર ટાયર પર GST દર 18%થી ઘટાડીને 5% કરવામાં આવ્યો છે. આ નિર્ણયથી ખેડૂતો માટે આવા ટાયરની કિંમતમાં રાહત મળવાની શક્યતા છે.
FMCG અને ફાર્મા કંપનીઓને ITCનો લાભ
ફ્રી સેમ્પલ તેમજ કાયદા મુજબ નષ્ટ કરવા પડતા એક્સપાયર થયેલા માલ પર પણ ITC સંબંધિત નિયમોમાં રાહત આપવામાં આવી છે. આ નિર્ણયથી ખાસ કરીને FMCG અને ફાર્મા કંપનીઓને ફાયદો થશે. દવા કંપનીઓ દ્વારા ડોક્ટરોને આપવામાં આવતા સેમ્પલ અને એક્સપાયર થયેલી દવાઓના નિકાલ સાથે જોડાયેલા ખર્ચમાં આ ફેરફાર મહત્વનો બની શકે છે.
₹10,000થી ઓછી ટેક્સ માંગણીમાં શો-કોઝ નોટિસ નહીં
નાના ટેક્સ વિવાદો ઘટાડવા માટે કાઉન્સિલે ₹10,000ની લઘુતમ મર્યાદા નક્કી કરી છે. આ મુજબ ₹10,000થી ઓછી ટેક્સ માંગણીના કેસમાં વેપારીઓને શો-કોઝ નોટિસ ન આપવાનો નિર્ણય લેવામાં આવ્યો છે. તેનો હેતુ નાના વિવાદોમાં વેપારીઓ અને ટેક્સ વિભાગ બંનેનો સમય તથા વહીવટી સંસાધનો બચાવવાનો છે.
