રાજ્યસભામાં MSME ડેવલપમેન્ટ (સુધારા) બિલ-2026 પસાર, નાના ઉદ્યોગોને લેટ પેમેન્ટથી મળશે મોટી રાહત
0 
0 
રાજ્યસભાએ MSME ડેવલપમેન્ટ (સુધારા) બિલ, 2026ને મંજૂરી આપી છે. આ બિલનો મુખ્ય હેતુ માઇક્રો, સ્મોલ અને મિડિયમ એન્ટરપ્રાઇઝિસ (MSME)ને સમયસર ચુકવણી સુનિશ્ચિત કરવાનો, વિલંબિત ચુકવણીના વિવાદોનો ઝડપી ઉકેલ લાવવાનો અને નાના ઉદ્યોગોના કેશ ફ્લોમાં સુધારો કરવાનો છે.
બિલની મુખ્ય જોગવાઈઓ
નવા સુધારા મુજબ, જો કોઈ ઓર્ડર સામેની અરજી છ મહિનાથી વધુ સમય સુધી પેન્ડિંગ રહે, તો અદાલત ખરીદદારને વિવાદિત રકમના ઓછામાં ઓછા 50 ટકા MSME સપ્લાયરના નામે જમા કરાવવાનો આદેશ આપી શકશે. ઉપરાંત, મધ્યસ્થી દ્વારા થયેલા સમાધાન અને આર્બિટ્રેશનના ચુકાદાઓની વસૂલાત જમીન મહેસૂલની બાકી રકમની જેમ કરી શકાશે.
બિલમાં કેટલાક નાના ગુનાઓને ડિક્રિમિનલાઇઝ કરવાની જોગવાઈ પણ કરવામાં આવી છે. પ્રથમ વખત નિયમભંગ કરનારને સીધી સજા બદલે ચેતવણી અથવા તબક્કાવાર દંડ આપવામાં આવશે. સાથે જ MSMEની મફત અને સ્વૈચ્છિક નોંધણી માટે રાષ્ટ્રીય ડિજિટલ પ્લેટફોર્મ શરૂ કરવાની જોગવાઈ પણ કરવામાં આવી છે.
MSME સેક્ટરનું મહત્વ
કેન્દ્રીય MSME મંત્રી જીતન રામ માંઝીએ જણાવ્યું કે આ સુધારા 2006ના કાયદાને વધુ અસરકારક બનાવશે અને નાના ઉદ્યોગોને લાંબા સમયથી પડતી ચુકવણી સંબંધિત સમસ્યાઓ દૂર કરવામાં મદદ કરશે. તેમના જણાવ્યા મુજબ, MSME સેક્ટર દેશના જીડીપીમાં આશરે 31 ટકા, મેન્યુફેક્ચરિંગ ઉત્પાદનામાં 36 ટકા અને કુલ નિકાસમાં 41 ટકા યોગદાન આપે છે. વર્ષ 2014-15માં MSMEને મળતી કુલ ક્રેડિટ લગભગ 10 લાખ કરોડ રૂપિયા હતી, જે હવે વધીને 38.35 લાખ કરોડ રૂપિયાથી વધુ થઈ ગઈ છે.
ચર્ચા દરમિયાન વિપક્ષનો હોબાળો
બિલ પર ચર્ચા દરમિયાન NEET પેપર લીક મુદ્દે વિદ્યાર્થીઓ સામે થયેલી પોલીસ કાર્યવાહીને લઈને વિપક્ષે ગૃહમાં વિરોધ નોંધાવ્યો અને ગૃહમંત્રીની હાજરીની માંગ કરી. ભારે હોબાળા છતાં BJD, TDP, BRS, YSRCP, AIADMK, NCP, BJP, UPPL અને BSP સહિત અનેક પક્ષોના સભ્યોએ બિલને સમર્થન આપ્યું, જેના બાદ રાજ્યસભાએ બિલ પસાર કર્યું.
