અમદાવાદમાં પ્લાસ્ટિક પ્રતિબંધની કડક કાર્યવાહી છતાં વપરાશ યથાવત્
0 
0 
અમદાવાદમાં પ્લાસ્ટિક મુક્ત શહેર અભિયાન અંતર્ગત મ્યુનિસિપલ કોર્પોરેશન દ્વારા કડક કાર્યવાહી કરવામાં આવી રહી છે. જુલાઈ 2025થી જુલાઈ 2026 દરમિયાન શહેરની દુકાનોમાંથી 9.56 ટનથી વધુ પ્રતિબંધિત પ્લાસ્ટિક જપ્ત કરવામાં આવ્યું છે.
આ સમયગાળા દરમિયાન 1.28 લાખથી વધુ દુકાનદારોને નોટિસ આપવામાં આવી, રૂ. 3.66 કરોડથી વધુનો દંડ વસૂલવામાં આવ્યો અને 970 એકમોને સીલ કરવામાં આવ્યા. શહેરમાં 120 માઈક્રોનથી ઓછી જાડાઈના સિંગલ-યુઝ પ્લાસ્ટિકના ઉપયોગ, વેચાણ અને ઉત્પાદન પર પ્રતિબંધ હોવા છતાં શાકભાજી, ફળો અને કરિયાણાની દુકાનોમાં તેનો ઉપયોગ હજુ પણ જોવા મળી રહ્યો છે.
ઝોન પ્રમાણે પશ્ચિમ ઝોનમાં સૌથી વધુ દંડ કરવામાં આવ્યો છે, જ્યારે ઉત્તર ઝોનમાંથી સૌથી વધુ પ્રતિબંધિત પ્લાસ્ટિક જપ્ત થયું છે. દક્ષિણ ઝોનમાં સૌથી વધુ એકમોને સીલ કરવામાં આવ્યા છે.
પ્લાસ્ટિકનો ઉપયોગ ઘટાડવા માટે મ્યુનિસિપલ કોર્પોરેશન દ્વારા 15 લાખ પરિવારોને 30 લાખ કાપડની થેલીઓનું વિતરણ કરવામાં આવ્યું છે. બીજી તરફ, વેપારીઓનું કહેવું છે કે જો પ્લાસ્ટિકના ઉપયોગ અને વેચાણ પર પ્રતિબંધ છે તો તેના ઉત્પાદન પર પણ સંપૂર્ણ પ્રતિબંધ મૂકવો જોઈએ.
મ્યુનિસિપલ કોર્પોરેશનના જણાવ્યા મુજબ, શહેરની બહારથી પ્રતિબંધિત પ્લાસ્ટિકનો જથ્થો અમદાવાદમાં આવી રહ્યો છે. શહેરની હદમાં પ્લાસ્ટિક બનાવતા કેટલાક એકમો સામે અગાઉ કાર્યવાહી કરવામાં આવી હતી, પરંતુ ઉત્પાદકો હવે શહેરની બહાર આવા એકમો ચલાવી રહ્યા હોવાનું જણાવાયું છે.
