CJP નેતાઓની ધરપકડ પર રાહુલ ગાંધીનો વિરોધ, કહ્યું- ‘જંતર-મંતર પર શાંતિપૂર્વક તિરંગો ફરકાવવો ગુનો નથી’
0 
0 
દિલ્હીના જંતર-મંતર ખાતે મુખ્ય ચૂંટણી કમિશનર (CEC) જ્ઞાનેશ કુમારના રાજીનામાની માંગ સાથે વિરોધ પ્રદર્શન કરવા બદલ કોકરોચ જનતા પાર્ટી (CJP)ના નેતાઓ સામે દિલ્હી પોલીસે કાર્યવાહી કરી છે. પોલીસે સૌરવ દાસ, આશુતોષ રાંકા અને અજિંક્યા શિંદેની ધરપકડ કરી હતી. આ દરમિયાન પોલીસે બેરિકેડિંગ તોડીને જંતર-મંતર પહોંચવાના આરોપમાં FIR પણ નોંધી છે.
બે નેતાઓને 5 દિવસની ન્યાયિક કસ્ટડી
CJP નેતાઓ સૌરવ દાસ અને આશુતોષ રાંકાને SEM કોર્ટમાં રજૂ કરવામાં આવ્યા હતા. કોર્ટે બંનેને 5 દિવસની ન્યાયિક કસ્ટડીમાં મોકલી દીધા છે. અજિંક્યા શિંદે સામે પણ પોલીસ દ્વારા કાયદેસરની કાર્યવાહી કરવામાં આવી છે.
રાહુલ ગાંધીએ CJP નેતાઓનું સમર્થન કર્યું
CJP નેતાઓની ધરપકડ અને ન્યાયિક કસ્ટડીને લઈને રાહુલ ગાંધીએ સરકાર અને પોલીસની કાર્યવાહી પર સવાલ ઉઠાવ્યા છે. તેમણે કહ્યું કે જંતર-મંતર જઈને શાંતિપૂર્વક તિરંગો ફરકાવીને વિરોધ કરવો કોઈ ગુનો નથી. તેમણે વધુમાં કહ્યું કે તિરંગો ભારતના નાગરિકોનો છે અને તેને પાછો મેળવીને જ રહેશે.
બેરિકેડિંગ તોડીને જંતર-મંતર પહોંચ્યા હોવાનો આરોપ
પોલીસના જણાવ્યા મુજબ, CJPના કાર્યકર્તાઓએ ભારે સુરક્ષા અને બેરિકેડિંગ વચ્ચે જંતર-મંતર વિસ્તારમાં પ્રવેશ કર્યો હતો. ત્યારબાદ મુખ્ય ચૂંટણી કમિશનર વિરુદ્ધ સૂત્રોચ્ચાર કરવામાં આવ્યા હતા. પરવાનગી વિના વિસ્તારમાં પ્રવેશ કરવા બદલ નેતાઓ અને અન્ય કાર્યકર્તાઓ સામે FIR નોંધવામાં આવી છે.
પોલીસના જણાવ્યા અનુસાર, અગાઉ શાંતિ જાળવવા માટે આપવામાં આવેલા પીસ બોન્ડની શરતોના ભંગ સંબંધિત કલમો પણ FIRમાં સામેલ કરવામાં આવી છે.
પોલીસ કાર્યવાહી બાદ કાર્યકર્તાઓ એકઠા થયા
CJPની લીગલ હેડ રત્ના સિંહે સોશિયલ મીડિયા પર જણાવ્યું હતું કે સૌરવ દાસ, આશુતોષ રાંકા અને અજિંક્યા શિંદેને SEM સમક્ષ રજૂ કરવાની પ્રક્રિયા હાથ ધરવામાં આવી હતી. પોલીસ સૂત્રો મુજબ, અટકાયત કરાયેલા કાર્યકર્તાઓને જાફરપુર કલાં પોલીસ સ્ટેશન લઈ જવામાં આવ્યા હતા. આ દરમિયાન મોટી સંખ્યામાં CJP કાર્યકર્તાઓ એકઠા થતાં વિસ્તારમાં સુરક્ષા વધારવામાં આવી હતી.
જંતર-મંતર અંગે દિલ્હી પોલીસનો નવો આદેશ
દિલ્હી પોલીસ કમિશનર અનુરાગ કુમારે 11 ઓક્ટોબરે આદેશ જાહેર કરીને રામલીલા મેદાન, બુરાડી મેદાન અને CBD મેદાનને ધરણા-પ્રદર્શન માટેના નિર્ધારિત સ્થળો તરીકે જાહેર કર્યા છે. આ યાદીમાંથી જંતર-મંતરને દૂર કરવામાં આવ્યું છે.
CJPનો દાવો છે કે આ અંગેની જાહેરાત 12 ઓક્ટોબરે કરવામાં આવી હતી અને તે જ દિવસે સંગઠનના પ્રતિનિધિઓ શાંતિપૂર્ણ વિરોધ માટે તારીખ અને સમય નક્કી કરવા સંસદ માર્ગ પોલીસ સ્ટેશન પહોંચ્યા હતા.
