મોદી-પેઝેશ્કિયન મુલાકાત બાદ અમેરિકાની ઈરાન નીતિ અંગે કડક ચેતવણી, ભારત સહિતના દેશોને પ્રતિબંધોની ધમકી
0 
0 
અમેરિકાના વિદેશ મંત્રી માર્કો રુબિયોએ ઈરાન સાથે વેપાર કરતા દેશોને કડક પ્રતિબંધોની ચેતવણી આપી છે. વડાપ્રધાન નરેન્દ્ર મોદી અને ઈરાનના પ્રમુખ મસૂદ પેઝેશ્કિયન વચ્ચે બિશકેકમાં યોજાયેલી SCO સમિટ દરમિયાન દ્વિપક્ષીય બેઠક બાદ રુબિયોનું આ નિવેદન સામે આવ્યું છે.
ઈરાન સાથે વેપાર કરનારા દેશોને ચેતવણી
માર્કો રુબિયોએ જણાવ્યું કે અમેરિકાએ ઈરાન પર લાદેલા પ્રતિબંધોને કોઈ દેશે ટાળવામાં મદદ ન કરવી જોઈએ. તેમણે કહ્યું કે ઈરાનને મળતી આવકનો ઉપયોગ આતંકવાદને પ્રોત્સાહન આપવા અથવા પરમાણુ હથિયારોના વિકાસ માટે થાય તેવી કોઈ વ્યવસ્થામાં દેશોએ સહભાગી ન થવું જોઈએ.
રુબિયોના જણાવ્યા અનુસાર, જો કોઈ દેશ ઈરાન સાથે એવો વેપાર કરાર કરે છે જે અમેરિકન પ્રતિબંધોને નિષ્ફળ બનાવવામાં મદદરૂપ થાય, તો તે દેશ સામે પણ અમેરિકાને કડક પ્રતિબંધો લાદવાની ફરજ પડી શકે છે. જોકે, ભારત અને ઈરાન વચ્ચે તાજેતરમાં કોઈ નવી ટ્રેડ ડીલ થઈ હોવાની માહિતી તેમને હોવાનું તેમણે જણાવ્યું નહોતું.
SCO સમિટમાં મોદી અને પેઝેશ્કિયન વચ્ચે મુલાકાત
કિર્ગિસ્તાનની રાજધાની બિશકેકમાં યોજાયેલી SCO સમિટ દરમિયાન વડાપ્રધાન મોદી અને ઈરાનના પ્રમુખ મસૂદ પેઝેશ્કિયન વચ્ચે દ્વિપક્ષીય બેઠક થઈ હતી. બંને નેતાઓએ પશ્ચિમ એશિયાની વર્તમાન સ્થિતિ અને ક્ષેત્રમાં વધી રહેલા તણાવ અંગે ચર્ચા કરી હતી.
વડાપ્રધાન મોદીએ ભારતનું વલણ રજૂ કરતાં જણાવ્યું હતું કે વિવાદોનો ઉકેલ યુદ્ધ નહીં પરંતુ વાતચીત અને કૂટનીતિ દ્વારા લાવવો જોઈએ. તેમણે દરિયાઈ માર્ગો અને મુક્ત વેપારની સુરક્ષા તેમજ સામાન્ય નાગરિકો અને જહાજોના નાવિકોની સલામતી સુનિશ્ચિત કરવા પર પણ ભાર મૂક્યો હતો.
પેઝેશ્કિયાને ભારતના સહયોગની પ્રશંસા કરી
ઈરાનના પ્રમુખ પેઝેશ્કિયાને તાજેતરના સંઘર્ષ દરમિયાન ભારત તરફથી મળેલા સહયોગની પ્રશંસા કરી હતી. તેમણે પશ્ચિમ એશિયામાં શાંતિ સ્થાપવા માટે ભારત પોતાની કૂટનીતિક ક્ષમતાનો ઉપયોગ કરે તેવી અપીલ કરી હતી.
સાથે જ પેઝેશ્કિયાને અમેરિકા પર આક્ષેપ કરતાં કહ્યું હતું કે કૂટનીતિનો માર્ગ અપનાવવાને બદલે અમેરિકાએ યુદ્ધ અને અશાંતિનો માર્ગ પસંદ કર્યો છે.
