ચૂંટણી પંચ સામે કોંગ્રેસના 6 ગંભીર આક્ષેપ, ફોર્મ-6થી SIR પ્રક્રિયા સુધી ઉઠાવ્યા સવાલ
0 
0 
ચૂંટણી પંચની કામગીરીને લઈને કોંગ્રેસે ફરી ગંભીર સવાલો ઉઠાવ્યા છે. કોંગ્રેસ મહાસચિવ જયરામ રમેશે સુપ્રીમ કોર્ટમાં ચૂંટણી પંચ દ્વારા રજૂ કરાયેલા સોગંદનામાને ભ્રામક ગણાવીને છ મુદ્દાઓ પર વાંધો વ્યક્ત કર્યો છે. પાર્ટીએ ફોર્મ-6માં ફેરફાર, મુખ્ય ચૂંટણી કમિશનરના નિર્ણયો, ECINet અને SIR પ્રક્રિયા સહિતના મુદ્દાઓ પર આક્ષેપો કર્યા છે.
ફોર્મ-6માં ફેરફારનો આરોપ
કોંગ્રેસનો આરોપ છે કે મતદાર નોંધણી માટેના ફોર્મ-6 સાથે જોડાયેલા નવા ઘોષણાપત્રને લઈને ચૂંટણી પંચે સ્પષ્ટતા કરી નથી. પાર્ટીના જણાવ્યા અનુસાર ઓનલાઈન ફોર્મ ભરવા માટે આ ઘોષણાપત્ર ફરજિયાત બનાવવામાં આવ્યું છે, જે મતદાર નોંધણીના નિયમો અંગે સવાલો ઊભા કરે છે.
મુખ્ય ચૂંટણી કમિશનરના નિર્ણય સામે સવાલ
જયરામ રમેશે દાવો કર્યો છે કે SIR સંબંધિત કેટલાક આદેશો અંગે બંને ચૂંટણી કમિશનરોએ સત્તાવાર રેકોર્ડમાં વાંધો નોંધાવ્યો હતો. તેમ છતાં આ વાંધાઓને અવગણીને એકતરફી રીતે નિર્ણયો લેવામાં આવ્યા હોવાનો કોંગ્રેસે આરોપ લગાવ્યો છે.
ECINet અને IT વિભાગ અંગે પણ વાંધો
કોંગ્રેસે ECINetના ઉપયોગને લઈને પણ પ્રશ્નો ઉઠાવ્યા છે. પાર્ટીનો દાવો છે કે મતદાર યાદીઓ પર કેન્દ્રીય નિયંત્રણ વધારવાના પ્રયાસમાં કાયદેસર સત્તા ધરાવતા મતદાર નોંધણી અધિકારીઓની ભૂમિકા ઓછી કરવામાં આવી રહી છે. ચૂંટણી પંચના IT વિભાગની કામગીરીને પણ કોંગ્રેસે અપારદર્શક ગણાવી છે અને આ અંગે અગાઉ કેબિનેટ સચિવને પત્ર લખ્યો હોવાનો દાવો કર્યો છે.
SIR પ્રક્રિયા સામે કોંગ્રેસનો વિરોધ
SIR પ્રક્રિયાને લઈને કોંગ્રેસે સૌથી ગંભીર આક્ષેપ કર્યો છે. પાર્ટીના જણાવ્યા મુજબ વિવિધ રાજ્યોમાં મોટી સંખ્યામાં મતદારોના નામ ઘટાડવા માટે ફોર્મ-7નો કથિત રીતે દુરુપયોગ કરવામાં આવ્યો છે. કોંગ્રેસે ચૂંટણી પંચ પર પોતાના ખુલાસાઓમાં કેટલીક હકીકતો છુપાવવાનો પણ આરોપ લગાવ્યો છે.
‘વોટ બચાવો’ રેલી પહેલાં મંજૂરી ન મળ્યાનો દાવો
કોંગ્રેસે 1 નવેમ્બરે દિલ્હીના રામલીલા મેદાનમાં યોજાનારી ‘વોટ બચાવો’ મહારેલીનો પણ ઉલ્લેખ કર્યો છે. પાર્ટીનો આરોપ છે કે રેલી પહેલાં મુખ્ય ચૂંટણી કમિશનર જ્ઞાનેશ કુમાર વિરુદ્ધ ‘જનતાની અદાલતમાં મહાભિયોગ’ કાર્યક્રમ યોજવાની મંજૂરી આપવામાં આવી નથી.
કોંગ્રેસ નેતા કે.સી. વેણુગોપાલે આરોપ લગાવ્યો છે કે દિલ્હી પોલીસ અને સરકાર વિપક્ષના અવાજને દબાવવાનો પ્રયાસ કરી રહી છે. કોંગ્રેસના આ તમામ આક્ષેપો વચ્ચે ચૂંટણી પંચની પ્રક્રિયા અને SIR અંગેનો રાજકીય તથા કાનૂની વિવાદ વધુ ઉગ્ર બન્યો છે.
