હાલ ગુજરાત રાજ્યમાં ધોરણ 10 અને 12ની બોર્ડ પરીક્ષાઓ ચાલી રહી છે, જેના કારણે શિક્ષણ વિભાગ તેમજ પ્રશાસન પહેલેથી જ સતર્ક સ્થિતિમાં છે. આવી સંવેદનશીલ પરિસ્થિતિ વચ્ચે હવે રાજ્યની કેટલીક મહત્વપૂર્ણ સરકારી કચેરીઓને બોમ્બથી ઉડાવી દેવાની ધમકી મળતા તંત્ર ચોંકી ઉઠ્યું હતું. સ્કૂલો અને કોર્ટ બાદ હવે પોસ્ટ ઓફિસો તથા પાસપોર્ટ ઓફિસોને ધમકીભર્યા ઈ-મેઈલ મળ્યા હોવાની માહિતી સામે આવી છે.
આ ધમકી મળતા જ પોલીસ તાત્કાલિક હરકતમાં આવી ગઈ હતી. સંબંધિત કચેરીઓ ખાતે પોલીસનો કાફલો, ડોગ સ્કવોડ તેમજ બોમ્બ સ્કવોડની વિશેષ ટીમોને તાત્કાલિક મોકલવામાં આવી હતી. સુરક્ષાને ધ્યાનમાં રાખીને ઓફિસોમાં હાજર કર્મચારીઓ અને નાગરિકોને બહાર કાઢવામાં આવ્યા હતા અને સમગ્ર પરિસરની સઘન તપાસ હાથ ધરવામાં આવી હતી. તપાસ દરમિયાન દરેક ખૂણેખાંચરાની ચકાસણી કરવામાં આવી રહી છે જેથી કોઈ શંકાસ્પદ વસ્તુ હોય તો સમયસર કાર્યવાહી કરી શકાય.
પ્રાપ્ત માહિતી અનુસાર આણંદ, અમરેલી, ભાવનગર અને સુરત સહિત રાજ્યના અનેક શહેરોમાં આવેલી પોસ્ટ અને પાસપોર્ટ કચેરીઓને આ પ્રકારના ધમકીભર્યા ઈ-મેઈલ મળ્યા છે. પોલીસ દ્વારા ઈ-મેઈલનો સ્ત્રોત શોધવા માટે સાયબર ક્રાઈમ શાખાની મદદ લેવામાં આવી રહી છે. સાથે જ, આ ઈ-મેઈલ કોઈ શરારતી તત્વો દ્વારા મોકલવામાં આવ્યા છે કે તેની પાછળ કોઈ ગૂઢ ષડયંત્ર છે તે દિશામાં પણ તપાસ શરૂ કરવામાં આવી છે.
હાલમાં તમામ સ્થળોએ સુરક્ષા વ્યવસ્થા કડક બનાવવામાં આવી છે અને પરિસ્થિતિ પર નજીકથી નજર રાખવામાં આવી રહી છે. અધિકારીઓએ નાગરિકોને અફવાઓથી દૂર રહેવા અને કોઈ પણ શંકાસ્પદ માહિતી અંગે તાત્કાલિક પોલીસને જાણ કરવા અપીલ કરી છે.
Leave a Reply