દિલ્હીમાં ફરી તણાવ: આજે પણ સંસદ તરફ કૂચ કરશે CJP, જંતર-મંતર પર રાતભર ચાલુ રહ્યું આંદોલન
0 
0 
દિલ્હીમાં ચોમાસુ સત્રના પ્રથમ દિવસે CJP (કોકરોચ જનતા પાર્ટી) દ્વારા આયોજિત “સંસદ ચલો” માર્ચ દરમિયાન પોલીસ અને પ્રદર્શનકારીઓ વચ્ચે ભારે ઘર્ષણ સર્જાયું હતું. આ અથડામણમાં દિલ્હી પોલીસના જણાવ્યા અનુસાર 118થી વધુ પોલીસકર્મીઓ સહિત અનેક પ્રદર્શનકારીઓ ઘાયલ થયા હતા. સ્થિતિ કાબૂમાં લેવા માટે પોલીસે ટીયર ગેસના શેલ છોડ્યા અને લાઠીચાર્જ કર્યો હતો.
આજે ફરી સંસદ માર્ચની જાહેરાત
ઘર્ષણ અને પોલીસ કાર્યવાહી છતાં CJPના સ્થાપક અભિજીત દીપકે સ્પષ્ટ કર્યું છે કે આંદોલન પાછું ખેંચવામાં આવશે નહીં. પાર્ટીએ મંગળવારે ફરી સંસદ તરફ કૂચ કરવાની જાહેરાત કરી છે.
જંતર-મંતર પર ફરી ભેગા થયા પ્રદર્શનકારીઓ
સોમવારે દિવસ દરમિયાન દિલ્હી પોલીસે જંતર-મંતર પરથી CJPનું મંચ અને બેરિકેડ્સ હટાવી દીધાં હતાં. જોકે, મોડી રાત્રે ફરી મોટી સંખ્યામાં પ્રદર્શનકારીઓ ત્યાં એકત્ર થયા અને નવો તંબૂ તેમજ અસ્થાયી મંચ તૈયાર કરીને આંદોલન ચાલુ રાખ્યું.
ધર્મેન્દ્ર પ્રધાનના રાજીનામાની માંગ
CJPના કાર્યકરો અને વિદ્યાર્થીઓ 6 જૂનથી જંતર-મંતર ખાતે સતત વિરોધ પ્રદર્શન કરી રહ્યા છે. તેમની મુખ્ય માંગણી કેન્દ્રીય શિક્ષણ મંત્રી ધર્મેન્દ્ર પ્રધાનના રાજીનામાની છે.
શિક્ષણશાસ્ત્રી અને સામાજિક કાર્યકર્તા સોનમ વાંગચુકે પણ આંદોલનને સમર્થન આપતાં અનિશ્ચિતકાલીન ભૂખ હડતાળ શરૂ કરી હતી. તબિયત બગડતાં દિલ્હી પોલીસે તેમને સફદરજંગ હોસ્પિટલમાં ખસેડ્યા હતા.
પથ્થરમારો અને પોલીસ કાર્યવાહી
સંસદ તરફ આગળ વધી રહેલા પ્રદર્શનકારીઓને રોકવા માટે પોલીસે બેરિકેડિંગ કર્યું હતું. ત્યારબાદ બંને પક્ષો વચ્ચે ઘર્ષણ વધતાં પથ્થરમારો થયો હોવાનું પોલીસનું કહેવું છે. પરિસ્થિતિ કાબૂમાં લેવા માટે પોલીસે ટીયર ગેસનો ઉપયોગ કર્યો અને લાઠીચાર્જ કર્યો.
ઘટનામાં અનેક પ્રદર્શનકારીઓ પણ ઈજાગ્રસ્ત થયા હોવાના વીડિયો સોશિયલ મીડિયા પર વાયરલ થયા છે. સુરક્ષાના ભાગરૂપે જંતર-મંતર અને આસપાસના વિસ્તારોમાં મોડી રાત સુધી મોબાઈલ ઈન્ટરનેટ સેવાઓ બંધ રાખવામાં આવી હતી.
સરકાર સાથે વાટાઘાટો
હિંસક ઘટનાક્રમ વચ્ચે સરકાર તરફથી ચર્ચાનો પ્રયાસ પણ કરવામાં આવ્યો હતો. CJPના પ્રતિનિધિમંડળે કેન્દ્રીય આરોગ્ય મંત્રી જે.પી. નડ્ડા સાથે બે બેઠક કરી હતી અને પોતાની ત્રણ મુખ્ય માંગણીઓ સાથેનું લેખિત મેમોરેન્ડમ પણ સોંપ્યું હતું.
પોલીસે તપાસ તેજ કરી
દિલ્હી પોલીસે સમગ્ર ઘટનાની તપાસ શરૂ કરી છે. CCTV ફૂટેજ અને મોબાઈલ વીડિયોનું વિશ્લેષણ કરવામાં આવી રહ્યું છે અને અનેક FIR નોંધવાની કાર્યવાહી હાથ ધરવામાં આવી છે. આજે ફરી સંસદ માર્ચની જાહેરાતને ધ્યાનમાં રાખીને રાજધાનીમાં સુરક્ષા વ્યવસ્થા વધુ કડક બનાવવામાં આવી છે.
હવે નજર સરકાર અને પ્રદર્શનકારીઓ વચ્ચેની આગામી વાટાઘાટો પર છે. ચર્ચાથી ઉકેલ આવશે કે ફરી એકવાર દિલ્હીના રસ્તાઓ પર તણાવપૂર્ણ સ્થિતિ સર્જાશે, તે જોવું રહ્યું.
