‘10 લાખ ખેડૂતોને ભેગા કરીશું’, જેતપરમાં કાળુ અમૃતિયાનો સરકારને પડકાર
0 
0 
મોરબી: મોરબી જિલ્લાના જેતપર ખાતે ચાલી રહેલા **‘ગુજરાત ખેડૂત સત્યાગ્રહ’**માં આંદોલન વધુ તેજ બન્યું છે. આંદોલનના નેતા અને રાજ્યના મંત્રી કાંતિ અમૃતિયાના ભાઈ કાળુ અમૃતિયાએ સરકાર અને વહીવટી તંત્રને ખુલ્લો પડકાર આપતાં જણાવ્યું છે કે હવે રાજ્યભરના 10 લાખથી વધુ ખેડૂતોને એક મંચ પર એકત્રિત કરવામાં આવશે.
સત્યાગ્રહ છાવણીમાં ખેડૂતોને સંબોધતા કાળુ અમૃતિયાએ કહ્યું કે, “આ ઉપવાસી છાવણી કોઈ પણ સંજોગોમાં બંધ થવાની નથી. વરસાદને કારણે હાલ શાંતિપૂર્ણ રીતે કાર્યક્રમ ચાલી રહ્યો છે, પરંતુ અત્યાર સુધીમાં 10 લાખથી વધુ લોકો છાવણીની મુલાકાત લઈ ચૂક્યા છે. હવે આ તમામ લોકોને એકસાથે ભેગા કરીને આગામી આંદોલનની વ્યૂહરચના નક્કી કરવામાં આવશે.”
તેમણે વધુમાં આરોપ લગાવ્યો કે કાલાવડ પંથકના ખેડૂતોને હજુ સુધી તેમના હક્કના નાણાં મળ્યા નથી. જો આંદોલન સમિતિ નિર્ણય કરશે તો ત્યાં જઈને વધુ ઉગ્ર કાર્યક્રમો હાથ ધરવામાં આવશે. તેમણે એવો પણ દાવો કર્યો કે અધિકારીઓના પ્રવેશ સામે ગામમાં કલમ 144 જેવી સ્થિતિ ઊભી કરવામાં આવી છે.
અંતમાં કાળુ અમૃતિયાએ ખેડૂતોને સંદેશ આપતા કહ્યું કે, “સરકાર જે કરવું હોય તે કરે, અમે કોઈથી ડરવાના નથી. ખેડૂતોને તેમના હક્કનો ન્યાય અપાવીને જ આ લડત પૂર્ણ થશે.”
