રશિયન પ્રમુખ પુતિન ભારત પહોંચ્યા, BRICS સમિટમાં લેશે ભાગ; PM મોદી સાથે કરશે મુલાકાત
0 
0 
નવી દિલ્હી: બ્રિક્સ સમિટ 2026માં ભાગ લેવા માટે રશિયાના રાષ્ટ્રપતિ વ્લાદિમીર પુતિન શુક્રવારે દિલ્હી પહોંચ્યા હતા. તેમનું વિમાન પાલમ એરફોર્સ સ્ટેશન પર ઉતર્યું હતું, જ્યાં વિદેશ રાજ્ય મંત્રી કીર્તિ વર્ધન સિંહે તેમનું સ્વાગત કર્યું હતું. દિલ્હી પહોંચ્યા બાદ પુતિનનો કાફલો હોટલ તરફ રવાના થયો હતો.
પુતિનની સુરક્ષા માટે ચાર સ્તરીય બંદોબસ્ત
પુતિનના ભારત પ્રવાસને ધ્યાનમાં રાખીને દિલ્હીમાં કડક સુરક્ષા વ્યવસ્થા ગોઠવવામાં આવી છે. તેમની સુરક્ષા માટે ચાર સ્તરીય સુરક્ષા ઘેરો તૈયાર કરવામાં આવ્યો છે. સૌથી અંદરના સ્તરે ક્લોઝ પ્રોટેક્શન ટીમ તૈનાત રહેશે. ત્યારબાદ દિલ્હી પોલીસના વરિષ્ઠ અધિકારીઓ, કમાન્ડો અને અર્ધલશ્કરી દળોના જવાનો સુરક્ષાની જવાબદારી સંભાળશે. બહારના સુરક્ષા ઘેરાની જવાબદારી સ્થાનિક પોલીસને સોંપવામાં આવી છે.
રશિયાની સુરક્ષા ટીમ પણ દિલ્હી પહોંચી છે અને ભારતીય સુરક્ષા એજન્સીઓ સાથે મળીને સમગ્ર વ્યવસ્થા પર નજર રાખી રહી છે.
PM મોદી સાથે દ્વિપક્ષીય બેઠક
ભારત આ વર્ષે બ્રિક્સનું અધ્યક્ષપદ સંભાળી રહ્યું છે. નવી દિલ્હીના ભારત મંડપમ ખાતે 12 અને 13 સપ્ટેમ્બરે બ્રિક્સ શિખર સંમેલન યોજાશે. આ દરમિયાન પુતિન વડાપ્રધાન નરેન્દ્ર મોદી સાથે દ્વિપક્ષીય બેઠક કરશે.
બંને નેતાઓ વચ્ચેની બેઠકમાં સંરક્ષણ, વેપાર, આર્થિક સહયોગ અને વૈશ્વિક મુદ્દાઓ સહિત વિવિધ મહત્વપૂર્ણ વિષયો પર ચર્ચા થવાની સંભાવના છે. છેલ્લા નવ મહિનામાં પુતિનનો આ બીજો ભારત પ્રવાસ છે, જે બંને દેશો વચ્ચેના વ્યૂહાત્મક સંબંધોના મહત્વને દર્શાવે છે.
