જ્ઞાનેશ કુમાર સામે વિરોધ તેજ, દેશના વિવિધ શહેરોમાં પ્રદર્શન; સુપ્રીમ કોર્ટમાં પણ અરજી
0 
0 
નવી દિલ્હી: મુખ્ય ચૂંટણી કમિશનર (CEC) જ્ઞાનેશ કુમારને લઈને કોંગ્રેસ સહિતના કેટલાક વિપક્ષી સંગઠનો દ્વારા વિરોધ પ્રદર્શન કરવામાં આવી રહ્યા છે. સોમવારે કોંગ્રેસ કાર્યકરોએ આગ્રામાં આવેલા જ્ઞાનેશ કુમારના પૈતૃક નિવાસસ્થાન બહાર વિરોધ કર્યો હતો. દરમિયાન ઘરની દિવાલ અને મુખ્ય દરવાજા પર અપમાનજનક સૂત્રો લખવામાં આવ્યા હતા. ઘટનાને પગલે પોલીસે કેસ નોંધી બે કોંગ્રેસ નેતાઓની ધરપકડ કરી હોવાનું અહેવાલોમાં જણાવાયું છે.
કોંગ્રેસ દ્વારા આ વિરોધને દેશવ્યાપી આંદોલનનો ભાગ ગણાવવામાં આવ્યો છે. પક્ષના કાર્યકરો દ્વારા મતદાર યાદીની સુધારણા પ્રક્રિયા એટલે કે Special Intensive Revision (SIR) અંગે સવાલો ઉઠાવવામાં આવી રહ્યા છે. વિરોધીઓ CECના રાજીનામાની પણ માંગ કરી રહ્યા છે.
CECની કામગીરીને લઈને સુપ્રીમ કોર્ટમાં અરજી
જ્ઞાનેશ કુમાર સામે ચાલી રહેલા વિવાદ વચ્ચે સુપ્રીમ કોર્ટમાં પણ અરજી દાખલ કરવામાં આવી છે. અરજીમાં આરોપ લગાવવામાં આવ્યો છે કે ચૂંટણી પંચના કેટલાક મહત્વપૂર્ણ નિર્ણયો અન્ય બે ચૂંટણી કમિશનરો સુખબીર સિંહ સંધુ અને વિવેક જોશીની સંમતિ વિના લેવામાં આવ્યા હતા.
અરજદારે SIR સાથે જોડાયેલા નિર્ણયો, Form-6માં કરવામાં આવેલા ફેરફારો તથા ચૂંટણી સંબંધિત ડેટા અને સોફ્ટવેરમાં થયેલા ફેરફારો અંગે સ્વતંત્ર તપાસની માંગ કરી છે. કેટલાક અહેવાલોમાં બંને ચૂંટણી કમિશનરો દ્વારા છેલ્લા દસ મહિનામાં અનેક મુદ્દાઓ પર વાંધો ઉઠાવવામાં આવ્યો હોવાનો ઉલ્લેખ છે.
જોકે, ચૂંટણી પંચે આંતરિક મતભેદોને તેની કામગીરીનો સામાન્ય હિસ્સો ગણાવ્યો છે અને જણાવ્યું છે કે અંતિમ નિર્ણયો પંચ દ્વારા લેવામાં આવે છે. તાજેતરમાં પંચે ECINET સોફ્ટવેરની સમીક્ષા સહિત SIR પ્રક્રિયામાં કેટલાક ફેરફારો અને સ્પષ્ટતાઓ પણ જાહેર કરી છે.
2 ઓક્ટોબરથી આંદોલનની જાહેરાત
જ્ઞાનેશ કુમારને હટાવવાની માંગને લઈને કોકરોચ જનતા પાર્ટી (CJP) સહિતના સંગઠનો દ્વારા આગામી દિવસોમાં વધુ વિરોધ પ્રદર્શનની જાહેરાત કરવામાં આવી છે. CJPએ 2 ઓક્ટોબરથી મુંબઈમાં જેલભરો આંદોલન શરૂ કરવાની ચીમકી આપી છે.
જ્ઞાનેશ કુમાર અંગે જૂનો આરોપ ફરી ચર્ચામાં
આ દરમિયાન CPM નેતા ટી.એમ. થોમસે 2006ના એક પ્રોજેક્ટ સાથે જોડાયેલા મલેશિયન અધિકારીની આત્મહત્યાની ઘટનાને લઈને જ્ઞાનેશ કુમારનું નામ હોવાનો દાવો કર્યો છે. તેમણે એવો પણ આરોપ મૂક્યો કે આત્મહત્યાની નોંધમાં કુમાર પર લાંચ માંગ્યાનો ઉલ્લેખ હતો. જોકે, થોમસે સ્વીકાર્યું છે કે તેમની પાસે આ સુસાઇડ નોટની નકલ ઉપલબ્ધ નથી. તેથી આ દાવાની સ્વતંત્ર પુષ્ટિ વગર તેને આરોપ તરીકે જ જોવો જરૂરી છે.
