ભારે વરસાદને કારણે GPSC અને TAT-HS પરીક્ષાઓ મોકૂફ, નવી તારીખ જાહેર
0 
0 
ગુજરાતમાં અમદાવાદ સહિત અનેક વિસ્તારોમાં ભારે વરસાદની આગાહીને ધ્યાનમાં રાખીને રાજ્ય પરીક્ષા બોર્ડ (SEB) અને ગુજરાત જાહેર સેવા આયોગ (GPSC) દ્વારા મહત્વનો નિર્ણય લેવામાં આવ્યો છે. આગામી દિવસોમાં યોજાનારી TAT-HS અને GPSCની પરીક્ષાઓ મોકૂફ રાખવામાં આવી છે.
TAT-HS મુખ્ય પરીક્ષા હવે 8 ઓગસ્ટે યોજાશે
રાજ્ય પરીક્ષા બોર્ડ દ્વારા જણાવવામાં આવ્યું છે કે, 2 ઓગસ્ટ, 2026ના રોજ યોજાનાર શિક્ષક અભિરુચિ કસોટી (ઉચ્ચત્તર માધ્યમિક) – 2026 (TAT-HS) ગુજરાતી માધ્યમની મુખ્ય પરીક્ષા ભારે વરસાદની આગાહીને કારણે મુલતવી રાખવામાં આવી છે.
હવે આ પરીક્ષા 8 ઓગસ્ટ, 2026ના રોજ શનિવારે લેવામાં આવશે.
બોર્ડે ઉમેદવારોને સૂચના આપી છે કે નવી હોલ ટિકિટ ડાઉનલોડ કરવાની જરૂર નથી. અગાઉ આપવામાં આવેલી હોલ ટિકિટ જ માન્ય રહેશે. પરીક્ષા કેન્દ્ર અને સમય અગાઉ મુજબ જ રહેશે.
ઉમેદવારો પરીક્ષા સંબંધિત વધુ માહિતી રાજ્ય પરીક્ષા બોર્ડની સત્તાવાર વેબસાઇટ પરથી મેળવી શકશે.
GPSC પ્રાથમિક પરીક્ષા 9 ઓગસ્ટે લેવાશે
ગુજરાત જાહેર સેવા આયોગ (GPSC) દ્વારા પણ 1 ઓગસ્ટ, 2026ના રોજ યોજાનારી પ્રાથમિક પરીક્ષા ભારે વરસાદની સ્થિતિને કારણે મોકૂફ રાખવામાં આવી છે.
હવે GPSCની આ પરીક્ષા 9 ઓગસ્ટ, 2026ના રોજ રવિવારે સવારે 11 વાગ્યાથી બપોરે 12 વાગ્યા સુધી યોજાશે.
GPSC અને TAT-HSના ઉમેદવારોએ જૂની હોલ ટિકિટ સાથે જ પરીક્ષા કેન્દ્ર પર હાજર રહેવાનું રહેશે.
