અમદાવાદ શહેરના એસજી હાઈવે અને આસપાસના વિસ્તારોમાં વધતી ટુ-વ્હીલર ચોરીની ઘટનાઓ વચ્ચે સોલા પોલીસે નોંધપાત્ર સફળતા મેળવી છે. સીસીટીવી ફૂટેજ અને હ્યુમન ઇન્ટેલિજન્સના આધારે પોલીસે રાજસ્થાનના બાંસવાડાથી સંકળાયેલી એક શાતિર ચોર ટોળકીને ઝડપી પાડી છે. આ ટોળકી પાસેથી કુલ 23 ચોરાયેલા બાઈક જપ્ત કરવામાં આવ્યા છે, જેના કારણે શહેરના અલગ-અલગ પોલીસ સ્ટેશનના 19 ગુનાઓ ઉકેલાઈ ગયા છે.
ચોરી કરવાની રીત ખૂબ ચાલાકીભરી
DCP હર્ષદ પટેલના જણાવ્યા મુજબ, મુખ્ય આરોપી ગોપાલ પોતાના સાગરીતો મુકેશ અને ભરત સાથે મળીને ચોરીઓને અંજામ આપતો હતો. તેઓ ખાસ કરીને એવા પાર્કિંગ સ્થળોને નિશાન બનાવતા જ્યાં લોકો આખો દિવસ માટે વાહન મુકીને કામ પર જતા હોય. ગોપાલ પાસે ડુપ્લીકેટ અને ઘસાઈ ગયેલી ચાવીઓનો જથ્થો રહેતો, જેના ઉપયોગથી તે જૂના અને ઢીલા લોકવાળા બાઈક સરળતાથી ખોલી લેતો. ચોરી કર્યા પછી બાઈકોને ભાડજ સર્કલ નજીક ઝાડીઓમાં છુપાવી દેવામાં આવતી, જેથી કોઈને શંકા ન થાય.
સીસીટીવી અને બાતમીથી મળી મોટી કડી
સોલા ભાગવત બ્રિજ નીચે સતત થઈ રહેલી ચોરીઓને ધ્યાનમાં રાખીને પોલીસે સીસીટીવી ફૂટેજનું વિશ્લેષણ કર્યું. તેમાં રાજસ્થાનના ગોપાલ સુધી પહોંચતી મહત્વપૂર્ણ માહિતી મળી. ત્યારબાદ રિંગ રોડ પર અદાણી પેટ્રોલ પંપ નજીક વોચ ગોઠવીને પોલીસે ગોપાલને ઝડપી પાડ્યો. તેની પૂછપરછ દરમિયાન અન્ય બે સાગરીતોની ઓળખ થઈ અને તેમને પણ ઝડપવામાં આવ્યા. આ કાર્યવાહીથી 19 ગુનાઓનો ભેદ ઉકેલાયો.
ઘણા પોલીસ સ્ટેશનોના કેસ ઉકેલાયા
જપ્ત કરાયેલા 23 બાઈકમાંથી સોલા હાઈકોર્ટ વિસ્તારમાં નોંધાયેલા 9 ગુનાઓ ઉપરાંત રામોલ, કૃષ્ણનગર, ઓઢવ, નિકોલ, સાબરમતી રિવરફ્રન્ટ અને કઠલાલ પોલીસ સ્ટેશનના કેસો પણ ઉકેલાયા છે. મુખ્ય આરોપી ગોપાલ અગાઉ પણ 11થી વધુ ચોરીના કેસોમાં સંડોવાયેલો હતો. તે નશાની લત માટે નહીં પરંતુ સરળ રીતે પૈસા કમાવવા માટે આ ગુનાખોરી કરતો હતો. હાલ સોલા પોલીસે ત્રણેય આરોપીઓની ધરપકડ કરીને વધુ તપાસ શરૂ કરી છે.
Leave a Reply