ચૂંટણીના કારણે ગુજરાત યુનિવર્સિટીએ બદલી પરીક્ષાની તારીખ

ગુજરાત યુનિવર્સિટીના વિદ્યાર્થીઓ માટે મહત્વપૂર્ણ અપડેટ સામે આવ્યું છે. સ્થાનિક સ્વરાજ્યની આવનારી ચૂંટણીને ધ્યાનમાં રાખીને યુનિવર્સિટી વહીવટી તંત્રએ UG અને PGના વિવિધ સેમેસ્ટરની પરીક્ષાઓના કાર્યક્રમમાં મોટા ફેરફારો કર્યા છે. આ નિર્ણયનો સીધો અસર અંદાજે 1.50 લાખ જેટલા વિદ્યાર્થીઓ પર પડશે.

ત્રણ તબક્કામાં ફેરફાર

અગાઉ પરીક્ષાઓ પાંચ તબક્કામાં યોજાવાની હતી, જેમાંથી બે તબક્કાની પરીક્ષાઓ પૂર્ણ થઈ ગઈ છે. પરંતુ બાકીના ત્રણ તબક્કાના કાર્યક્રમમાં હવે ફેરફાર કરવામાં આવ્યો છે.

સુધારેલા કાર્યક્રમ મુજબ

16 એપ્રિલથી શરૂ થતી પરીક્ષાઓ હવે 1 મે થી શરૂ થશે
24 એપ્રિલની પરીક્ષાઓ હવે 12 મે થી યોજાશે
5 મેની પરીક્ષાઓ હવે 21 મે થી લેવામાં આવશે

કયા વિદ્યાર્થીઓ પર અસર?

આર્ટસ, કોમર્સ, સાયન્સ, લો અને એજ્યુકેશન સહિત તમામ વિદ્યાશાખાઓના વિદ્યાર્થીઓ આ ફેરફારથી પ્રભાવિત થશે. ખાસ કરીને NEP હેઠળના અને ઇન્ટિગ્રેટેડ કોર્સના વિદ્યાર્થીઓને હવે મે મહિનાની ગરમીમાં પરીક્ષા આપવી પડશે. B.A., B.Com., B.Sc. સેમેસ્ટર 2, 4 અને 6 તેમજ M.A. અને M.Com.ના વિદ્યાર્થીઓને તૈયારી માટે વધુ સમય મળશે, પરંતુ પરિણામોમાં મોડું થવાની શક્યતા વધી શકે છે.

વહીવટી તંત્રની તૈયારી

યુનિવર્સિટી દ્વારા સુધારેલો કાર્યક્રમ તમામ સંલગ્ન કોલેજો અને વિભાગોને મોકલી આપવામાં આવ્યો છે. ચૂંટણીને કારણે સ્ટાફ અને ઇમારતોની ઉપલબ્ધતા પર અસર પડતા આ નિર્ણય લેવાયો છે. પરીક્ષા દરમિયાન સેન્ટરો પર પાણી અને વીજળી જેવી સુવિધાઓ સુનિશ્ચિત કરવામાં આવશે.

નવા શેડ્યૂલ મુજબ પરીક્ષાઓ

1 મે થી શરૂ થતી પરીક્ષાઓ:

B.A., B.Com., B.Sc., B.B.A., B.C.A., B.R.S. (સેમેસ્ટર 4 અને 6),

M.A. (સેમેસ્ટર 3),

ઇન્ટિગ્રેટેડ કોર્સ (સેમેસ્ટર 2, 4, 6, 8, 10),

LL.B. (સેમેસ્ટર 2), B.Ed. (સેમેસ્ટર 2)

12 મે થી શરૂ થતી પરીક્ષાઓ:

M.A., M.Com., M.Sc., M.R.S., M.M.C.J., M.Ed. (સેમેસ્ટર 2),

B.A., B.Com., B.Sc., B.B.A., B.C.A. (સેમેસ્ટર 2),

NEP હેઠળના UG કોર્સ (સેમેસ્ટર 4)

21 મે થી શરૂ થતી પરીક્ષાઓ:

NEP હેઠળના UG-PG અને ડિપ્લોમા કોર્સના વિવિધ સેમેસ્ટર