દેશવ્યાપી કરોડો રૂપિયાના સાયબર ફ્રોડના એક મોટા કૌભાંડમાં રાજકોટ જિલ્લા પોલીસની સાયબર ક્રાઈમ શાખાએ મહત્વપૂર્ણ કાર્યવાહી હાથ ધરી છે. તપાસ દરમિયાન યસ બેન્ક સાથે સંકળાયેલા ત્રણ અધિકારીઓની સંડોવણી બહાર આવતા પોલીસે તેમની ધરપકડ કરી છે અને વધુ પૂછપરછ માટે કોર્ટમાંથી બે દિવસના રિમાન્ડ પણ મેળવી લીધા છે.
આ કેસમાં ધરપકડ કરાયેલા આરોપીઓમાં મૌલિક રામજી કમાણી (રહે. પાતા મેઘપર, તા. કાલાવડ), કલ્પેશ વિઠ્ઠલભાઈ ડાંગરીયા (રહે. કાલાવડ શીતળા, જામનગર) અને અનુરાગ ચંદુભાઈ બાલધા (રહે. જામકંડોરણા)નો સમાવેશ થાય છે. ત્રણેયમાં મૌલિક કમાણી હાલ યસ બેન્કમાં કાર્યરત છે, જ્યારે બાકીના બે આરોપીઓ અગાઉ યસ બેન્ક સાથે જોડાયેલા હતા અને હાલમાં અન્ય બેન્કોમાં નોકરી કરે છે.
આ સમગ્ર કૌભાંડની શરૂઆત પડધરી પોલીસ મથકે નોંધાયેલા એક ગુનાથી થઈ હતી. બાદમાં આ કેસની ગંભીરતાને ધ્યાનમાં રાખીને તેની તપાસ સાયબર ક્રાઈમ શાખાને સોંપવામાં આવી હતી, જ્યાં પીઆઈ આર. જે. ગોધમના માર્ગદર્શન હેઠળ તપાસ આગળ વધારવામાં આવી રહી છે.
તપાસ દરમિયાન સામે આવ્યું કે જુદા-જુદા એપીએમસી એકાઉન્ટ્સ મારફતે મોટા પાયે નાણાંની હેરફેર કરવામાં આવી હતી. શરૂઆતમાં લગભગ 1500 કરોડ રૂપિયાના ટ્રાન્ઝેક્શન નોંધાયા હતા, જેમાંથી અંદાજે 23 કરોડ રૂપિયાની રકમ સીધી સાયબર ફ્રોડ સાથે સંકળાયેલી હોવાનું સામે આવ્યું હતું. બાકીના ટ્રાન્ઝેક્શન ગેમિંગ અને જીએસટી સંબંધિત હોવાનું જણાયું હતું. જોકે, તપાસ આગળ વધતાં આ આંકડો ચોંકાવનારી રીતે વધી ગયો છે અને હવે કુલ ટ્રાન્ઝેક્શન 2500 કરોડ રૂપિયા સુધી પહોંચી ગયા છે.
આ 2500 કરોડ રૂપિયાના ટ્રાન્ઝેક્શન કુલ 85 અલગ-અલગ બેન્ક ખાતાઓમાં થયા હોવાનું ખુલ્યું છે. આ ખાતાઓમાંથી 74 કરોડ રૂપિયા કરતાં વધુની રકમ સીધી સાયબર ફ્રોડના માધ્યમથી જમા કરાઈ હોવાનું જણાયું છે. આ મામલે દેશભરમાંથી અત્યાર સુધીમાં 535થી વધુ ફરિયાદો નોંધાઈ ચૂકી છે, જે આ કૌભાંડના વ્યાપને દર્શાવે છે.
પોલીસે અત્યાર સુધીમાં કુલ 17 આરોપીઓને ઝડપી પાડ્યા છે. તપાસ દરમિયાન પડધરીના મોવિયા વિસ્તારમાં આવેલી યસ બેન્કની શાખાના કેટલાક કર્મચારીઓની ભૂમિકા પણ શંકાસ્પદ જણાઈ હતી. વધુ તપાસમાં તે સમયે આ શાખામાં પર્સનલ બેન્કર તરીકે કાર્યરત મૌલિક કમાણી, મેનેજર તરીકે કાર્યરત કલ્પેશ ડાંગરીયા અને પર્સનલ બેન્કર તરીકે જ કાર્યરત અનુરાગ બાલધાની સીધી સંડોવણી સામે આવી હતી. જેના આધારે પોલીસે ત્રણેયની ધરપકડ કરી કોર્ટમાં રજૂ કર્યા હતા, જ્યાંથી તેમને બે દિવસના રિમાન્ડ પર સોંપવામાં આવ્યા છે.
સાયબર ક્રાઈમ શાખાના સૂત્રોના જણાવ્યા મુજબ, આ કૌભાંડની વધુ ઊંડાણપૂર્વક તપાસ કરવા માટે એક ચાર્ટર્ડ એકાઉન્ટન્ટની નિમણૂક કરવામાં આવી છે. તેમના દ્વારા અત્યાર સુધીમાં લગભગ 35 જેટલી ફર્મો અને તેમની સાથે જોડાયેલા 85 બેન્ક ખાતાઓની વિગતવાર તપાસ ચાલી રહી છે. પ્રાથમિક તારણો સૂચવે છે કે કૌભાંડનો આંકડો આગળ જતાં વધુ વધી શકે છે.
પોલીસ હાલ આ સમગ્ર નેટવર્કને તોડી પાડવા માટે પુરજોશમાં તપાસ કરી રહી છે અને આવનારા સમયમાં વધુ ખુલાસાઓ થવાની શક્યતા નકારી શકાય તેમ નથી.
Leave a Reply