કેરળના પૂર્વ મુખ્યમંત્રી Pinarayi Vijayan અને તેમની પુત્રી વીણા વિજયનના નિવાસસ્થાન સહિત કુલ 10 સ્થળો પર પ્રવર્તન નિર્દેશાલય (ED) દ્વારા કરવામાં આવેલા દરોડાઓ બાદ રાજ્યના રાજકારણમાં ભારે ગરમાવો જોવા મળી રહ્યો છે. કન્નૂર અને તિરુવનંતપુરમ સ્થિત નિવાસસ્થાનો પર ઇડીની કાર્યવાહી પૂર્ણ થતાં જ ત્યાં હાઈ-વોલ્ટેજ ડ્રામા સર્જાયો હતો.
ઇડી અધિકારીઓને કાર્યકરોએ ઘેરી લીધા
દરોડા પૂર્ણ કરીને બહાર નીકળતા ઇડીના અધિકારીઓને CPI(M) ના કાર્યકરો અને સમર્થકોએ ગેટ પાસે જ રોકી લીધા હતા. કાર્યકરોએ કેન્દ્રીય એજન્સીઓ વિરુદ્ધ જોરદાર સૂત્રોચ્ચાર શરૂ કરતાં તણાવપૂર્ણ સ્થિતિ સર્જાઈ હતી. પક્ષના વરિષ્ઠ નેતાઓ અને સ્થાનિક આગેવાનોને વચ્ચે પડીને કાર્યકરોને શાંત પાડવા પડ્યા હતા, ત્યારબાદ જ ઇડીના અધિકારીઓને ત્યાંથી સુરક્ષિત રીતે બહાર કાઢવામાં આવ્યા હતા.
“ED હવે BJP-RSSનું રાજકીય હથિયાર” – CPI(M)
આ કાર્યવાહી અંગે CPI(M) ના મહાસચિવ M. A. Baby એ કેન્દ્ર સરકાર અને ઇડી પર આકરા પ્રહારો કર્યા હતા. તેમણે આ દરોડાને રાજકીય પ્રેરિત કાર્યવાહી ગણાવી હતી. તેમના જણાવ્યા મુજબ, ભાજપ અને RSS દ્વારા વિપક્ષના નેતાઓને ડરાવવા તથા અવાજ દબાવવા માટે કેન્દ્રીય એજન્સીઓનો ઉપયોગ કરવામાં આવી રહ્યો છે.
જૂના કેસોનો ઉલ્લેખ કરીને કેન્દ્ર પર નિશાન
CPI(M) એ દાવો કર્યો કે દેશના વિવિધ ભાગોમાં મોટા રાજકીય નેતાઓ, મુખ્યમંત્રીઓ અને નાયબ મુખ્યમંત્રીઓ સામે મનઘડંત આરોપો લગાવી કાર્યવાહી કરવામાં આવી રહી છે. પક્ષે Arvind Kejriwal અને Manish Sisodia ના કેસોનો ઉલ્લેખ કરતાં કહ્યું કે ટ્રાયલ કોર્ટ દ્વારા રાહત મળ્યા બાદ પણ ઇડીનો દુરુપયોગ અટક્યો નથી. CPI(M) ના નેતાઓએ આક્ષેપ કર્યો કે ઇડી હવે સ્વતંત્ર તપાસ એજન્સી નહીં પરંતુ સત્તાધારી પક્ષનું રાજકીય સાધન બની ગઈ છે.
શું છે સમગ્ર મામલો?
આ સમગ્ર કેસ કથિત મની લોન્ડ્રિંગ અને ગેરકાયદેસર નાણાકીય વ્યવહારો સાથે જોડાયેલો છે. વર્ષ 2017માં વીણા વિજયનની IT કંપની ‘Exalogic Solutions Private Limited’ (ESPL) અને કોચ્ચિ સ્થિત ખાનગી કંપની ‘Cochin Minerals and Rutile Limited’ (CMRL) વચ્ચે સોફ્ટવેર અને માર્કેટિંગ સેવાઓ માટે કરાર થયો હતો.
જો કે આરોપો મુજબ, વર્ષ 2018-19થી લઈને આગામી ત્રણ વર્ષ દરમિયાન ESPL કંપનીએ કોઈ વાસ્તવિક સેવા આપ્યા વગર CMRL પાસેથી કરોડો રૂપિયાની ચુકવણી મેળવી હતી. નોંધનીય છે કે CMRLમાં રાજ્ય સરકારની સંસ્થા KSIDC ની આશરે 13.4 ટકા હિસ્સેદારી હોવાનું પણ સામે આવ્યું છે.
તપાસનો સમગ્ર ઇતિહાસ
- વર્ષ 2019માં આવકવેરા વિભાગે CMRL પર દરોડા પાડ્યા ત્યારે પ્રથમ વખત આ શંકાસ્પદ વ્યવહારો સામે આવ્યા હતા.
- જાન્યુઆરી 2024માં કેન્દ્ર સરકારે મામલાની ગંભીરતા ધ્યાનમાં રાખીને SFIO દ્વારા તપાસના આદેશ આપ્યા હતા.
- માર્ચ 2024માં IT વિભાગ અને SFIO ના અહેવાલોના આધારે ઇડીએ મની લોન્ડ્રિંગનો કેસ નોંધ્યો હતો.
- એપ્રિલ 2025માં SFIO દ્વારા કોર્ટમાં સત્તાવાર ચાર્જશીટ દાખલ કરવામાં આવી હતી.
આ જ ચાર્જશીટ અને તપાસના આધારે હવે ઇડીએ પૂર્વ મુખ્યમંત્રી પિનરાઈ વિજયન અને તેમની પુત્રી સાથે જોડાયેલા 10 સ્થળો પર સર્ચ ઓપરેશન હાથ ધર્યું છે, જેના પગલે કેરળમાં રાજકીય વિરોધ અને પ્રદર્શનો વધુ ઉગ્ર બન્યા છે.
Leave a Reply