અમદાવાદમાં ચોમાસાની શરૂઆત સાથે જ શહેરના વિવિધ વિસ્તારોમાં રસ્તાઓ પર મહાકાય ભુવા પડવાની ઘટનાઓ સામે આવી છે. ખાસ કરીને શીલજ અને સાબરમતી વિસ્તારમાં જમીન ધસી પડતાં રસ્તાઓ બંધ કરવાની ફરજ પડી હતી. સદનસીબે બંને ઘટનાઓમાં કોઈ જાનહાનિ થઈ નથી, પરંતુ વાહનચાલકોને ભારે મુશ્કેલીનો સામનો કરવો પડી રહ્યો છે.
શીલજમાં ખોદકામ દરમિયાન જમીન ધસી પડી
શીલજ સર્કલ નજીક આર્યમાન બંગલાની તરફ જતા માર્ગ પર ચાલી રહેલા ખોદકામ દરમિયાન વરસાદના કારણે જમીન ધસી પડતાં મોટો ભુવો સર્જાયો હતો. ઘટનાના સમયે રોડ પહેલાથી જ બંધ હોવાથી કોઈ અકસ્માત સર્જાયો નહોતો. જાણ થતાં જ AMCની ટીમ સ્થળ પર પહોંચી હતી અને સુરક્ષા માટે બેરિકેડિંગ કરીને સમારકામની કામગીરી હાથ ધરી હતી.
સાબરમતીમાં 2 કિમી માર્ગ બંધ
સાબરમતી સ્નાનાગાર નજીક પણ રસ્તા પર મોટો ભુવો પડતાં સાવચેતીના ભાગરૂપે પાવર હાઉસથી BRTS સુધીનો અંદાજે 2 કિલોમીટરનો માર્ગ વાહનવ્યવહાર માટે બંધ કરવામાં આવ્યો હતો. પરિણામે વાહનચાલકોને વૈકલ્પિક માર્ગોનો ઉપયોગ કરવો પડ્યો અને ટ્રાફિકની સમસ્યા ઊભી થઈ.
પ્રી-મોન્સૂન કામગીરી પર ઉઠ્યા પ્રશ્નો
ચોમાસાના પ્રથમ વરસાદમાં જ શહેરના રસ્તાઓની આવી સ્થિતિ સામે આવતા AMCની પ્રી-મોન્સૂન કામગીરી અંગે અનેક સવાલો ઉઠી રહ્યા છે. નાગરિકોનું કહેવું છે કે માત્ર ભુવા કે ખાડા પૂરવાથી સમસ્યાનો કાયમી ઉકેલ આવવાનો નથી. રસ્તાઓની ગુણવત્તા, કામગીરીની પારદર્શિતા અને જવાબદારી નક્કી કરવા માટે અસરકારક પગલાં લેવાની જરૂર છે.
મહત્વના સવાલો
- દર વર્ષે પ્રી-મોન્સૂન કામગીરીના દાવા છતાં પ્રથમ વરસાદમાં જ રસ્તાઓ કેમ બેસી જાય છે?
- રોડના સમારકામ અને જાળવણી માટે ખર્ચાતા કરોડો રૂપિયાનો વાસ્તવિક લાભ નાગરિકોને કેમ મળતો નથી?
- માર્ગ નિર્માણ અને સમારકામની ગુણવત્તાની સ્વતંત્ર તપાસ થશે?
- જો બેદરકારી અથવા ગુણવત્તામાં ખામી સાબિત થાય તો જવાબદારો સામે કડક કાર્યવાહી કરવામાં આવશે?
Leave a Reply