ઝારખંડના રામગઢ જિલ્લામાં રાંચી-પટના નેશનલ હાઈવે (NH-33) પર આવેલા ચુટ્ટૂપાલૂ ઘાટીમાં બુધવારે ગંભીર માર્ગ અકસ્માત સર્જાયો હતો. ઘાટીમાંથી નીચે ઉતરી રહેલા ટ્રેલરની બ્રેક ફેલ થતાં તે અનિયંત્રિત બની ગયો અને એક પછી એક 12 વાહનોને ટક્કર મારી હતી. આ અકસ્માતમાં 20થી વધુ લોકો ઘાયલ થયા છે, જેમાં કેટલાકની હાલત ગંભીર હોવાનું જાણવા મળ્યું છે.
પ્રત્યક્ષદર્શીઓના જણાવ્યા મુજબ, ટ્રેલરે પહેલા આગળ ચાલી રહેલી કાર અને અન્ય ભારે વાહનોને જોરદાર ટક્કર મારી હતી. અથડામણ એટલી ભયાનક હતી કે એક કાર ટ્રેલર અને કન્ટેનર વચ્ચે દબાઈ ગઈ હતી. અકસ્માત બાદ સમગ્ર વિસ્તારમાં અફરાતફરીનો માહોલ સર્જાયો હતો.
ઘટનાની જાણ થતાં જ પોલીસ અને સ્થાનિક પ્રશાસનની ટીમ તાત્કાલિક સ્થળ પર પહોંચી હતી. સ્થાનિકોની મદદથી બચાવ કામગીરી હાથ ધરાઈ હતી અને અકસ્માતગ્રસ્ત વાહનોમાં ફસાયેલા લોકોને બહાર કાઢીને નજીકની હોસ્પિટલમાં સારવાર માટે ખસેડવામાં આવ્યા હતા.
આ અકસ્માતને કારણે રાંચી-પટના નેશનલ હાઈવે પર લાંબો ટ્રાફિક જામ સર્જાયો હતો. રસ્તા પર પડેલા ક્ષતિગ્રસ્ત વાહનોને દૂર કરવા માટે ક્રેનની મદદ લેવામાં આવી હતી, ત્યારબાદ ધીમે-ધીમે વાહનવ્યવહાર ફરી શરૂ કરવામાં આવ્યો હતો. પોલીસે પ્રાથમિક તપાસમાં અકસ્માતનું કારણ ટ્રેલરની બ્રેક ફેલ થવાનું હોવાનું જણાવ્યું છે અને સમગ્ર મામલે વધુ તપાસ શરૂ કરી છે.
Leave a Reply