મોહરમના સરઘસ દરમિયાન દેશના વિવિધ રાજ્યોમાંથી અકસ્માતો અને હિંસક ઘટનાઓના અહેવાલ સામે આવ્યા છે. મધ્યપ્રદેશના રતલામ જિલ્લામાં તાજિયા હાઇ-ટેન્શન વીજ લાઇનના સંપર્કમાં આવતા ત્રણ લોકોના મોત થયા હતા, જ્યારે લગભગ 20 લોકો દાઝ્યા હતા. બીજી તરફ, બિહારના શિવહરમાં બે અખાડા વચ્ચે રસ્તો આપવાના વિવાદે હિંસક સ્વરૂપ ધારણ કરતાં 10થી 15 લોકો ઘાયલ થયા હતા.
બિહારમાં બે અખાડા વચ્ચે હિંસક અથડામણ
બિહારના શિવહર જિલ્લામાં મોહરમની તૈયારી દરમિયાન યોજાયેલા અખાડાના સરઘસમાં રસ્તો આપવા મુદ્દે ઇસ્લામિયા અને મન્સૂરિયા અખાડા વચ્ચે વિવાદ થયો હતો. શરૂઆતમાં થયેલી બોલાચાલી બાદ ગાંધી ચોક નજીક બંને જૂથો ફરી સામસામે આવી ગયા હતા અને લાકડીઓ તેમજ પથ્થરમારો શરૂ થયો હતો.
પ્રત્યક્ષદર્શીઓના જણાવ્યા મુજબ, લગભગ એક કલાક સુધી વિસ્તારમાં તંગદિલીનો માહોલ રહ્યો હતો. ઘટનામાં બંને પક્ષના 10થી 15 લોકો ઘાયલ થયા હતા. ઘટનાસ્થળે મોટી સંખ્યામાં લોકો હાજર હતા. જાણ થતાં જ પોલીસ ઘટનાસ્થળે પહોંચી પરિસ્થિતિ કાબુમાં લીધી હતી. પોલીસે જણાવ્યું છે કે હાલ સ્થિતિ નિયંત્રણમાં છે અને સમગ્ર મામલે તપાસ શરૂ કરવામાં આવી છે.
રતલામમાં તાજિયા હાઇ-ટેન્શન લાઇનને અડકતાં દુર્ઘટના
મધ્યપ્રદેશના રતલામ જિલ્લાના હતનારા ગામમાં મોહરમના સરઘસ દરમિયાન આશરે 10 ફૂટ ઊંચો તાજિયા 11 કિલોવોલ્ટની હાઇ-ટેન્શન વીજ લાઇનના સંપર્કમાં આવી ગયો હતો. કરંટ ફેલાતા તાજિયા લઈ જઈ રહેલા લોકો તેની ઝપેટમાં આવી ગયા હતા.
આ દુર્ઘટનામાં ત્રણ લોકોના મોત થયા હતા, જ્યારે લગભગ 20 લોકો દાઝ્યા હતા. ગંભીર રીતે ઘાયલોને રતલામ મેડિકલ કોલેજમાં સારવાર માટે ખસેડવામાં આવ્યા છે. અકસ્માત સમયે સરઘસમાં અંદાજે 200 લોકો હાજર હતા.
ઉજ્જૈનમાં જોખમી સ્ટંટનો વીડિયો વાયરલ
ઉજ્જૈન જિલ્લાના બડનગરમાં મોહરમના સરઘસ દરમિયાન કરવામાં આવેલા જોખમી સ્ટંટનો વીડિયો સોશિયલ મીડિયા પર વાયરલ થયો છે. વીડિયોમાં ટાટા મેજિક વાનને ક્રેનની મદદથી આશરે 40 ફૂટની ઊંચાઈએ હવામાં લટકાવવામાં આવી હતી. વાહન પર ઉભેલા બે યુવાનો ઝંડા લહેરાવતા જોવા મળે છે અને ત્યારબાદ વાનમાં જોરદાર વિસ્ફોટ કરવામાં આવે છે.
સ્ટંટને લઈને સવાલો, પોલીસે તપાસ શરૂ કરી
વાયરલ વીડિયો બાદ સમગ્ર ઘટનાની ટીકા થઈ રહી છે. કેટલાક સંતો અને સામાજિક સંગઠનોએ આવા જોખમી પ્રદર્શન માટે મંજૂરી કેવી રીતે આપવામાં આવી તે અંગે સવાલો ઉઠાવ્યા છે. પોલીસના જણાવ્યા મુજબ, આયોજકોની પૂછપરછ શરૂ કરવામાં આવી છે. વિસ્ફોટ માટે વપરાયેલી સામગ્રી, જરૂરી મંજૂરી અને સમગ્ર ઘટનાની તપાસ ચાલી રહી છે. તપાસ પૂર્ણ થયા બાદ જવાબદાર લોકો સામે કાયદેસરની કાર્યવાહી કરવામાં આવશે.
વહીવટીતંત્રની અપીલ
ઘટનાઓ બાદ સંબંધિત જિલ્લાઓના વહીવટીતંત્રે લોકોને શાંતિ જાળવવા અને અફવાઓથી દૂર રહેવાની અપીલ કરી છે. પોલીસે જણાવ્યું છે કે તમામ કેસોની નિષ્પક્ષ તપાસ કરવામાં આવી રહી છે અને કાયદો-વ્યવસ્થામાં ખલેલ પહોંચાડનાર અથવા બેદરકારી દાખવનારાઓ સામે કડક કાર્યવાહી કરવામાં આવશે.
Leave a Reply