લખનૌ, 22 જૂન: ઉત્તર પ્રદેશની રાજધાની લખનૌના અલીગંજ વિસ્તારમાં આવેલા એક કોચિંગ સેન્ટરમાં રવિવારે અચાનક ભીષણ આગ ફાટી નીકળતા અફરાતફરીનો માહોલ સર્જાયો હતો. પુરનિયા ચોરાહા નજીક લોક સેવા આયોગની પાછળ આવેલી ઇમારતમાં લાગેલી આગને કારણે વિદ્યાર્થીઓ અને સ્ટાફમાં ભારે ગભરાટ ફેલાયો હતો.
આગની જ્વાળાઓ અને ગાઢ ધુમાડા વચ્ચે કેટલાક વિદ્યાર્થીઓએ પોતાનો જીવ બચાવવા માટે બિલ્ડિંગ પરથી કૂદકો માર્યો હતો. ઘટનાની જાણ થતાં જ ફાયર બ્રિગેડની 14 ગાડીઓ, હાઇડ્રોલિક પ્લેટફોર્મ સહિત, તાત્કાલિક ઘટનાસ્થળે પહોંચી ગઈ હતી અને આગ પર કાબૂ મેળવવા તેમજ બચાવ કામગીરી શરૂ કરી હતી.
પ્રાથમિક માહિતી મુજબ, ઇમારતમાં હજુ પણ કેટલાક લોકો ફસાયેલા હોવાની આશંકા વ્યક્ત કરવામાં આવી રહી છે. બચાવ દળો દ્વારા તમામ માળ પર સર્ચ ઓપરેશન ચલાવવામાં આવી રહ્યું છે.
ઘટનાની ગંભીરતાને ધ્યાનમાં રાખીને નાયબ મુખ્યમંત્રી બ્રજેશ પાઠક, જિલ્લા મેજિસ્ટ્રેટ વિશાખ તેમજ ADCP નોર્થ ટ્વિંકલ જૈન સહિતના વરિષ્ઠ અધિકારીઓ તાત્કાલિક સ્થળ પર પહોંચ્યા હતા. તેમની સાથે ACP અલીગંજ શશિ પ્રકાશ મિશ્ર, ADM સિટી અને સ્થાનિક પોલીસ અધિકારીઓ પણ હાજર રહ્યા હતા. અધિકારીઓએ રાહત અને બચાવ કામગીરીની સીધી દેખરેખ રાખી પરિસ્થિતિની સમીક્ષા કરી હતી.
ઉત્તર પ્રદેશના મુખ્યમંત્રીએ પણ ઘટનાની નોંધ લઈને સંબંધિત અધિકારીઓને તાત્કાલિક જરૂરી કાર્યવાહી કરવા સૂચના આપી હતી. તેમણે બચાવ કામગીરીમાં ઝડપ લાવવા તેમજ ઇજાગ્રસ્તોને શ્રેષ્ઠ સારવાર ઉપલબ્ધ કરાવવા આદેશ આપ્યો હતો. સાથે જ ઘાયલ વિદ્યાર્થીઓના ઝડપી સ્વાસ્થ્યલાભ માટે શુભેચ્છા વ્યક્ત કરી અને સરકાર તરફથી તમામ જરૂરી સહાય પૂરી પાડવાની ખાતરી આપી હતી.
Leave a Reply