અમદાવાદના પોશ વિસ્તાર બોપલમાંથી શાકાહારી ગ્રાહકોની લાગણીઓને ઠેસ પહોંચાડે તેવી અને ફૂડ સેફ્ટી અંગે ગંભીર પ્રશ્નો ઉભા કરતી એક ચોંકાવનારી ઘટના સામે આવી છે. બોપલ સ્થિત મેકડોનાલ્ડ્સ આઉટલેટ દ્વારા એક ગ્રાહકને ઓનલાઈન ઓર્ડરમાં વેજ બર્ગરની જગ્યાએ નોનવેજ બર્ગર ડિલિવર કરવામાં આવ્યો હોવાનો આક્ષેપ કરવામાં આવ્યો છે. આ ઘટનાને લઈને સ્થાનિક નાગરિકોમાં ભારે રોષ જોવા મળી રહ્યો છે.
વેજ બર્ગરના ઓર્ડરમાં નોનવેજ ફૂડ મળ્યાનો આક્ષેપ
મળતી માહિતી મુજબ, એક ગ્રાહકે ઓનલાઈન ફૂડ ડિલિવરી એપ્લિકેશન મારફતે બોપલ સ્થિત મેકડોનાલ્ડ્સમાંથી વેજ બર્ગરનો ઓર્ડર આપ્યો હતો. જોકે, ઓર્ડર પ્રાપ્ત થયા બાદ પેકિંગ ખોલીને તપાસ કરતાં બર્ગરમાં વેજના બદલે નોનવેજ સામગ્રી હોવાનું સામે આવ્યું હતું. આ ઘટનાથી ગ્રાહકને ભારે આઘાત લાગ્યો હોવાનું જાણવા મળ્યું છે.
રજૂઆત કરવા પહોંચેલા ગ્રાહકના આક્ષેપ
ઘટનાની જાણ થતાં ગ્રાહક સીધા મેકડોનાલ્ડ્સ આઉટલેટ પર પહોંચ્યા હતા અને સ્ટોર મેનેજમેન્ટ સમક્ષ રજૂઆત કરી હતી. ગ્રાહકનો આક્ષેપ છે કે સ્ટાફ અને મેનેજમેન્ટે ભૂલ સ્વીકારવાને બદલે ઉદ્ધતાઈભર્યું વર્તન કર્યું હતું તેમજ યોગ્ય જવાબદારી સ્વીકારવામાં પણ આનાકાની કરી હતી.
વેજ અને નોનવેજ ફૂડના સંચાલન અંગે પ્રશ્નો
પીડિત ગ્રાહકે વધુમાં આક્ષેપ કર્યો છે કે આઉટલેટના કિચનમાં વેજ અને નોનવેજ ખાદ્યસામગ્રીના સંચાલન તથા તૈયારી દરમિયાન પૂરતું વિભાજન જાળવવામાં આવતું નથી. તેમના જણાવ્યા અનુસાર, હાઇજીન અને ફૂડ હેન્ડલિંગ સંબંધિત જરૂરી માપદંડોનું પાલન થતું ન હોવાનું પ્રાથમિક રીતે જણાયું હતું.
આ ઘટનાએ શાકાહારી ગ્રાહકોમાં ચિંતા અને અસંતોષ ફેલાવ્યો છે. ખાસ કરીને અમદાવાદ જેવા શહેરમાં, જ્યાં મોટી સંખ્યામાં લોકો ધાર્મિક અને વ્યક્તિગત કારણોસર શાકાહારી જીવનશૈલી અપનાવે છે, ત્યાં આવી ઘટના ફૂડ સેફ્ટી અને ગ્રાહકોના વિશ્વાસ અંગે ગંભીર પ્રશ્નો ઉભા કરે છે. હાલ સમગ્ર મામલે સંબંધિત તંત્ર દ્વારા તપાસ કરવામાં આવે તેવી માંગ ઉઠી રહી છે.
Leave a Reply