કેરળના રાજકારણમાં હાલના સૌથી મોટા સમાચાર સામે આવ્યા છે. પ્રવર્તન નિર્દેશાલય (ED) એ કેરળના પૂર્વ મુખ્યમંત્રી અને હાલના વિપક્ષના નેતા Pinarayi Vijayan વિરુદ્ધ મોટી કાર્યવાહી હાથ ધરી છે. ED દ્વારા તેમની સાથે જોડાયેલા અનેક સ્થળો પર એકસાથે દરોડા પાડવામાં આવ્યા છે. આ કાર્યવાહી તેમની દીકરી વીણા વિજયનની IT કંપની ‘એક્સાલોજિક સોલ્યુશન્સ’ સાથે જોડાયેલા કથિત મની લોન્ડરિંગ કેસને લઈને કરવામાં આવી હોવાનું સામે આવ્યું છે.
પૂર્વ મુખ્યમંત્રીના નિવાસસ્થાન સહિત 10 સ્થળોએ તપાસ
મળતી માહિતી મુજબ, EDની અલગ-અલગ ટીમોએ આજે વહેલી સવારથી જ પૂર્વ મુખ્યમંત્રી સાથે જોડાયેલા સ્થળો પર સર્ચ ઓપરેશન શરૂ કર્યું હતું. અધિકારીઓના જણાવ્યા પ્રમાણે, તેમના નિવાસસ્થાન સહિત કુલ 10 જગ્યાઓ પર તપાસ ચાલી રહી છે. આ સમગ્ર કાર્યવાહી કોચીન મિનરલ્સ એન્ડ રૂટાઈલ લિમિટેડ (CMRL) અને વીણા વિજયનની કંપની વચ્ચે થયેલા શંકાસ્પદ નાણાકીય વ્યવહારોની તપાસના ભાગરૂપે કરવામાં આવી રહી છે.
હાઈકોર્ટના નિર્ણય બાદ EDની તાત્કાલિક કાર્યવાહી
મહત્વપૂર્ણ બાબત એ છે કે આ દરોડા કેરળ હાઈકોર્ટના એક મહત્વપૂર્ણ નિર્ણય બાદ પડ્યા છે. મંગળવારે હાઈકોર્ટે CMRL અને વીણા વિજયનની કંપની વચ્ચેના વ્યવહારોની ED તપાસ પર રોક લગાવવાની માંગ કરતી અરજી ફગાવી દીધી હતી. કોર્ટ તરફથી રાહત ન મળતાં જ EDએ આક્રમક કાર્યવાહી શરૂ કરી હતી.
શું છે સમગ્ર મામલો?
આ સમગ્ર વિવાદની શરૂઆત વર્ષ 2019માં થઈ હતી, જ્યારે આવકવેરા વિભાગે CMRL કંપની પર દરોડા પાડ્યા હતા. તપાસ દરમિયાન સામે આવ્યું હતું કે 2017થી 2019 દરમિયાન CMRLએ વીણા વિજયનની કંપની એક્સાલોજિક સોલ્યુશન્સને આશરે ₹1.72 કરોડ ચૂકવ્યા હતા. આરોપ છે કે આ રકમ કોઈ વાસ્તવિક સોફ્ટવેર અથવા IT સેવા આપ્યા વગર માત્ર નકલી ખર્ચ તરીકે દર્શાવવામાં આવી હતી.
આ ખુલાસા બાદ EDએ પ્રિવેન્શન ઓફ મની લોન્ડરિંગ એક્ટ (PMLA) હેઠળ ગુનો નોંધી તપાસ શરૂ કરી હતી.
હાઈકોર્ટમાં શું દલીલો થઈ?
CMRLના મેનેજિંગ ડિરેક્ટર એસ.એન. શશિધરન કાર્થા અને અન્ય અધિકારીઓએ કેરળ હાઈકોર્ટમાં અરજી કરીને ED દ્વારા દાખલ કરાયેલી ECIR અને સમન્સ રદ કરવાની માંગ કરી હતી. તેમની દલીલ હતી કે આ મામલામાં PMLA હેઠળ કોઈ ગુનો બનતો નથી અને Serious Fraud Investigation Office (SFIO) પહેલેથી જ આ કેસની તપાસ કરી રહી હોવાથી EDની કાર્યવાહી જરૂરી નથી.
કોર્ટનો સ્પષ્ટ નિર્ણય
જસ્ટિસ ટી.આર. રવિની બેન્ચે તમામ દલીલો ફગાવી દીધી હતી. કોર્ટે સ્પષ્ટ કહ્યું કે EDને કોઈ ઔપચારિક FIR વગર પણ પૂછપરછ કરવાનો અને સમન્સ જારી કરવાનો અધિકાર છે. સાથે જ અદાલતે નોંધ્યું કે SFIO અને ED બંને એજન્સીઓની તપાસનો હેતુ અને વ્યાપ અલગ-અલગ છે.
હાઈકોર્ટના આ નિર્ણય બાદ હવે Pinarayi Vijayan અને તેમના પરિવારની મુશ્કેલીઓ વધવાની શક્યતા વ્યક્ત કરવામાં આવી રહી છે.
Leave a Reply