અમદાવાદના નરેન્દ્ર મોદી સ્ટેડિયમ ખાતે 31 મેના રોજ રમાનારી IPL 2026ની ફાઇનલ મેચ પહેલા ટિકિટોના કાળાબજારનો મોટો ભાંડો ફૂટ્યો છે. અમદાવાદ શહેર પોલીસ અને ક્રાઇમ બ્રાન્ચે અલગ-અલગ કાર્યવાહી કરીને કુલ પાંચ આરોપીઓની ધરપકડ કરી છે. તેમની પાસેથી મેચની ટિકિટો અને મોબાઇલ ફોન સહિતનો મુદ્દામાલ જપ્ત કરવામાં આવ્યો છે.
ન્યૂ CG રોડ પરથી ત્રણ શખ્સ ઝડપાયા
ચાંદખેડા પોલીસને મળેલી બાતમીના આધારે ન્યૂ CG રોડ વિસ્તારમાં દરોડો પાડવામાં આવ્યો હતો. અહીંથી 21 વર્ષીય ઇશાન ભટ્ટ અને 21 વર્ષીય નિર્મલકુમાર નામના બે યુવકોની અટકાયત કરવામાં આવી હતી. બંને મૂળ રાજસ્થાનના રહેવાસી છે અને હાલ અમદાવાદમાં રહે છે.
પોલીસ તપાસ દરમિયાન તેમની પાસેથી IPL ફાઇનલની બે ટિકિટ મળી આવી હતી. આ ટિકિટોની મૂળ કિંમત ₹3,500 હતી, પરંતુ આરોપીઓ તેને ₹15,000 પ્રતિ ટિકિટના ભાવે વેચવાનો પ્રયાસ કરી રહ્યા હતા.
પૂછપરછ દરમિયાન આરોપીઓએ જણાવ્યું હતું કે બાપુનગરની એક હોટલમાં રોકાયેલા ઋષભ ચંદ્ર દર્લેશા જૈન નામના યુવકે તેમને ટિકિટો પૂરી પાડી હતી. પોલીસે ઋષભને પણ ઝડપી પાડ્યો હતો. પ્રાથમિક તપાસમાં જાણવા મળ્યું કે તેણે ટિકિટો મૂળ કિંમતે ખરીદી હતી અને વધુ નફો મેળવવાના હેતુથી બંને યુવકોને વેચાણ માટે આપી હતી.
સિંધુ ભવન રોડ પરથી બે આરોપીઓની ધરપકડ
બીજી તરફ, અમદાવાદ ક્રાઇમ બ્રાન્ચને માહિતી મળી હતી કે સિંધુ ભવન રોડ વિસ્તારમાં પણ IPL ફાઇનલની ટિકિટોનું કાળાબજાર થઈ રહ્યું છે. જેના આધારે કાર્યવાહી કરતાં બોડકદેવના માન પટેલ (ઉંમર 19 વર્ષ) અને ગોમતીપુરના સફીક ઉર્ફે બન્ની મોહમ્મદ અયુબ અંસારીની ધરપકડ કરવામાં આવી હતી.
પોલીસે તેમની પાસેથી બ્લોક-Fની ચાર ટિકિટો જપ્ત કરી હતી. આ ટિકિટોની મૂળ કિંમત ₹3,500 હતી, પરંતુ આરોપીઓ તેને ₹10,000 પ્રતિ ટિકિટના ભાવે વેચવાનો પ્રયાસ કરી રહ્યા હતા. બંનેએ અગાઉથી ઓનલાઇન ટિકિટો બુક કરાવી હોવાનું કબૂલ્યું હતું.
આ ઉપરાંત પોલીસે તેમની પાસેથી અંદાજે ₹1.25 લાખની કિંમતના બે સ્માર્ટફોન પણ જપ્ત કર્યા છે.
વધુ તપાસ શરૂ
ઝડપાયેલા તમામ પાંચ આરોપીઓ સામે ગુજરાત પોલીસ અધિનિયમની સંબંધિત કલમો હેઠળ ગુનો નોંધવામાં આવ્યો છે. પોલીસ હવે તપાસ કરી રહી છે કે આરોપીઓ કોઈ મોટા સંગઠિત નેટવર્ક અથવા ગેંગ સાથે સંકળાયેલા છે કે નહીં.
IPL ફાઇનલને ધ્યાનમાં રાખીને નરેન્દ્ર મોદી સ્ટેડિયમ અને આસપાસના વિસ્તારોમાં સુરક્ષા વ્યવસ્થા વધુ કડક બનાવવામાં આવી છે અને ટિકિટોના ગેરકાયદે વેચાણ પર સતત નજર રાખવામાં આવી રહી છે.
Leave a Reply