કેદારનાથ: ચાર ધામ યાત્રાની શરૂઆતથી અત્યાર સુધીમાં 40 દિવસના ગાળામાં 10 લાખથી વધુ શ્રદ્ધાળુઓએ કેદારનાથ ધામના દર્શન કર્યા છે. જોકે ઉત્તરાખંડમાં છેલ્લા કેટલાક દિવસોથી પડી રહેલા ભારે વરસાદને કારણે યાત્રા વ્યવસ્થાને ગંભીર અસર પહોંચી છે. સુરક્ષાના કારણોસર પ્રશાસને કેદારનાથ યાત્રાને અસ્થાયી રીતે સ્થગિત કરવાનો નિર્ણય લીધો છે.
ભારે વરસાદના કારણે ચંપાવત વિસ્તારમાં નદીના વધેલા પ્રવાહમાં આશરે 50 જેટલા યાત્રાળુઓ ફસાઈ ગયા હતા. સ્થાનિક વહીવટીતંત્ર અને બચાવ દળે તાત્કાલિક રેસ્ક્યૂ ઓપરેશન હાથ ધરી તમામ શ્રદ્ધાળુઓને સુરક્ષિત રીતે બહાર કાઢ્યા હતા. હવામાન વિભાગે આગામી દિવસોમાં ઉત્તરાખંડના ઊંચાઈવાળા વિસ્તારોમાં હિમવર્ષાની પણ આગાહી કરી છે, જેના કારણે યાત્રા માર્ગો પર વિશેષ સાવચેતી રાખવામાં આવી રહી છે.
બીજી તરફ, દેશના અનેક રાજ્યોમાં હવામાનમાં અચાનક મોટો પલટો જોવા મળી રહ્યો છે. કાળઝાળ ગરમીથી પરેશાન લોકોને વરસાદના આગમનથી રાહત મળી છે. રાજધાની દિલ્હીમાં વરસાદ નોંધાયો હતો, જ્યારે હવામાન વિભાગે ઉત્તર-પશ્ચિમ અને મધ્ય ભારતના વિસ્તારોમાં તેજ પવન સાથે વરસાદની આગાહી વ્યક્ત કરી છે.
રાજસ્થાનમાં ધૂળની આંધીએ જનજીવનને અસર પહોંચાડી હતી. અનેક વિસ્તારોમાં આકાશ ધૂળના વંટોળ અને ઘેરા વાદળોથી છવાઈ ગયું હતું. કેટલાક સ્થળોએ હળવાથી મધ્યમ વરસાદ પણ નોંધાયો હતો. તેમ છતાં ફાલોદી વિસ્તારમાં મહત્તમ તાપમાન 42 ડિગ્રી સેલ્સિયસ સુધી નોંધાયું હતું.
હિમાચલ પ્રદેશમાં પણ અનેક વિસ્તારોમાં હળવો વરસાદ પડ્યો હતો. રુદ્રપ્રયાગ જિલ્લાના પોલીસ અધિક્ષક નિહારિકા તોમરે જણાવ્યું હતું કે અત્યાર સુધીમાં 10 લાખથી વધુ શ્રદ્ધાળુઓએ કેદારનાથ ધામના દર્શન કર્યા છે, જ્યારે 7.25 લાખથી વધુ યાત્રાળુઓ બદરીનાથ ધામની મુલાકાત લઈ ચૂક્યા છે.
સતત વરસાદ અને હિમવર્ષાની સંભાવના વચ્ચે પણ શ્રદ્ધાળુઓનો ઉત્સાહ યથાવત જોવા મળી રહ્યો છે. ભારે યાત્રાધામના ધસારાને કારણે જોશીમઠ અને આસપાસના વિસ્તારોમાં 20થી 25 કિલોમીટર લાંબી વાહનોની કતારો લાગી ગઈ છે. પરિણામે અનેક યાત્રાળુઓ કલાકો સુધી ટ્રાફિક જામમાં ફસાયેલા જોવા મળ્યા હતા.
Leave a Reply