આમિર ખાનના ભાણેજ ઇમરાન ખાન સામે મુંબઈ પોલીસનું મોટું એક્શન, 28 ઓક્ટોબર સુધીમાં ભારત છોડવાની નોટિસ
0 
0 
મુંબઈ: બોલિવૂડ અભિનેતા અને આમિર ખાનના ભાણેજ ઇમરાન ખાન સામે મુંબઈ પોલીસે મોટી કાર્યવાહી કરી છે. અમેરિકન નાગરિકત્વ ધરાવતા ઇમરાન ખાનને રાજકીય વિરોધ પ્રદર્શનમાં ભાગ લેવા બદલ 28 ઓક્ટોબર 2026 સુધીમાં ભારત છોડવાની નોટિસ આપવામાં આવી છે.
10 ઓક્ટોબરના વિરોધ પ્રદર્શનમાં થયા હતા સામેલ
10 ઓક્ટોબરે મુંબઈના ઓગસ્ટ ક્રાંતિ મેદાન ખાતે ‘કોકરોચ જનતા પાર્ટી’ (CJP) દ્વારા મુખ્ય ચૂંટણી કમિશનર જ્ઞાનેશ કુમારના રાજીનામાની માંગ સાથે વિરોધ પ્રદર્શન યોજાયું હતું. આ પ્રદર્શનમાં ઇમરાન ખાન પણ હાજર રહ્યા હતા. તે દરમિયાન મુંબઈ પોલીસે ઇમરાન ખાન સહિત અનેક લોકોની અટકાયત કરી હતી અને બાદમાં તેમને છોડી મૂકવામાં આવ્યા હતા.
અમેરિકન નાગરિકત્વ અને OCI કાર્ડ ધરાવે છે ઇમરાન ખાન
પોલીસની તપાસમાં સામે આવ્યું કે ઇમરાન ખાન ભારતીય નાગરિક નથી, પરંતુ તેમની પાસે અમેરિકન નાગરિકત્વ અને OCI કાર્ડ છે. પોલીસના જણાવ્યા અનુસાર, ભારતમાં રહેતા વિદેશી નાગરિકો માટે રાજકીય પ્રવૃત્તિઓમાં ભાગ લેવા અંગે નિયંત્રણો છે. આ મામલે ઈમિગ્રેશન કાયદા હેઠળ કાર્યવાહી કરવામાં આવી હોવાનું સામે આવ્યું છે.
કિરિટ સોમૈયાની ફરિયાદ બાદ કાર્યવાહી
ભાજપ નેતા કિરિટ સોમૈયાએ મુંબઈ પોલીસના જોઈન્ટ પોલીસ કમિશનરને પત્ર લખીને ઇમરાન ખાનના વિરોધ પ્રદર્શનમાં સામેલ થવા અંગે તપાસની માંગ કરી હતી. સોમૈયાએ સવાલ ઉઠાવ્યો હતો કે વિદેશી નાગરિક હોવા છતાં ઇમરાન ખાન કઈ મંજૂરી હેઠળ રાજકીય પ્રદર્શનમાં સામેલ થયા હતા. ત્યારબાદ પોલીસે આ મામલે કાર્યવાહી આગળ વધારી હતી.
અટકાયત સમયે ઇમરાન ખાને શું કહ્યું હતું?
અટકાયત પહેલાં મીડિયા સાથે વાત કરતા ઇમરાન ખાને કહ્યું હતું કે તેમની કોઈ વ્યક્તિગત માંગ નથી અને તેઓ કોઈ રાજકીય પક્ષ કે સંસ્થાનું પ્રતિનિધિત્વ કરતા નથી. તેમણે પોતાને શહેરના સામાન્ય નાગરિક તરીકે ગણાવતા કહ્યું હતું કે લોકોના અવાજને કેમ દબાવવામાં આવી રહ્યો છે અને તેમની અવરજવર પર કેમ નિયંત્રણ મૂકવામાં આવી રહ્યું છે તે જોવા તેઓ ત્યાં આવ્યા હતા.
આ દરમિયાન ઇમરાન ખાનની પાર્ટનર લેખા વોશિંગ્ટન અને અભિનેત્રી ઝૈન મેરી ખાન સાથે પણ પોલીસની કાર્યવાહી દરમિયાન ઘર્ષણ થયાના આક્ષેપો થયા હતા. અટકાયત બાદ ઇમરાને પોલીસ વાનમાંથી સેલ્ફી શેર કરીને સોશિયલ મીડિયા પર લખ્યું હતું, “લાગે છે હું લોંગ ડ્રાઈવ પર જઈ રહ્યો છું.”
હવે મુંબઈ પોલીસની નોટિસ બાદ ઇમરાન ખાન સામે કાનૂની મુશ્કેલીઓ વધી છે. નોટિસ મુજબ તેમણે 28 ઓક્ટોબર 2026 સુધીમાં ભારત છોડવું પડી શકે છે.
