ગુજરાતમાં પેટ્રોલ, ડીઝલ અને ઘરેલુ LPG સિલિન્ડરની અછત અંગે ફેલાતી અફવાઓ વચ્ચે Bharat Petroleum Corporation Limited (BPCL) એ સ્પષ્ટતા કરી છે કે રાજ્યમાં ઇંધણનો પુરવઠો પૂરતો અને સતત ઉપલબ્ધ છે. કંપનીના સત્તાવાર નિવેદન અનુસાર, ગ્રાહકોને કોઈપણ પ્રકારની ચિંતા કરવાની જરૂર નથી.
BPCLએ જણાવ્યું છે કે ગુજરાતભરમાં તેમના તમામ ફ્યુઅલ સ્ટેશનો (પેટ્રોલ પંપ) અને LPG વિતરણ કેન્દ્રો નિયમિત રીતે કાર્યરત છે અને ગ્રાહકોની ઊર્જા જરૂરિયાતોને પૂરી કરવા માટે સંપૂર્ણ રીતે સજ્જ છે. કંપનીએ ખાસ વિનંતી કરી છે કે લોકો ગભરાટમાં આવીને અનાવશ્યક સંગ્રહખોરી (panic buying) ન કરે, કારણ કે સપ્લાય ચેઇન વ્યવસ્થા મજબૂત અને કાર્યક્ષમ છે.
કંપનીએ વધુમાં જણાવ્યું કે તે ઊર્જાની ઉપલબ્ધતા અને વિશ્વસનીયતા જાળવવા માટે પ્રતિબદ્ધ છે અને ગ્રાહકોને શાંતિ જાળવવા અપીલ કરી છે.
BPCL વિશે વાત કરીએ તો, તે ભારતની બીજી સૌથી મોટી ઓઈલ માર્કેટિંગ કંપની છે અને તેને સરકાર તરફથી ‘મહારત્ન’નો દરજ્જો મળેલો છે. મુંબઈ, કોચી અને બીના ખાતે આવેલી તેની રિફાઈનરીઓ દ્વારા કંપનીની વાર્ષિક રિફાઈનિંગ ક્ષમતા આશરે 35.3 MMTPA છે. દેશભરમાં 23,500થી વધુ પેટ્રોલ પંપ અને 6,200થી વધુ LPG વિતરણ કેન્દ્રો દ્વારા કંપની કરોડો ગ્રાહકો સુધી પહોંચે છે.
પર્યાવરણ અને ટકાઉ વિકાસને ધ્યાનમાં રાખીને, BPCLએ અત્યાર સુધીમાં 6,500થી વધુ પેટ્રોલ પંપ પર ઇલેક્ટ્રિક વાહન (EV) ચાર્જિંગ સ્ટેશનો સ્થાપિત કર્યા છે. સાથે જ, કંપનીએ 2040 સુધી ‘નેટ ઝીરો એનર્જી કંપની’ બનવાનું લક્ષ્ય નક્કી કર્યું છે અને તે માટે ગ્રીન એનર્જી તથા ટકાઉ ઉકેલો તરફ રોકાણ કરી રહી છે.
Leave a Reply