રાજ્યભરમાં શૈક્ષણિક વર્ષ 2026-27નો પ્રારંભ થતાં વિદ્યાર્થીઓમાં નવા ઉત્સાહનો માહોલ જોવા મળી રહ્યો છે. જોકે, નવા સત્રના પ્રથમ જ દિવસે વાલીઓ માટે મોંઘવારીના વધુ એક ઝટકાના સમાચાર સામે આવ્યા છે. CNG ગેસના સતત વધતા ભાવ અને વાહન સંચાલન ખર્ચમાં થયેલા વધારાને ધ્યાનમાં રાખીને અમદાવાદ સ્કૂલ વર્ધી એસોસિએશને સ્કૂલ વાહનોના ભાડામાં વધારો કરવાનો નિર્ણય લીધો છે.
તાજેતરમાં યોજાયેલી એસોસિએશનની મહત્વપૂર્ણ બેઠકમાં સર્વાનુમતે નક્કી કરવામાં આવ્યું છે કે સ્કૂલ વાનના માસિક ભાડામાં ₹200 અને સ્કૂલ રિક્ષાના માસિક ભાડામાં ₹100નો વધારો કરવામાં આવશે. આ નિર્ણય આજથી અમલમાં આવ્યો છે.
એસોસિએશનના જણાવ્યા અનુસાર, છેલ્લા બે વર્ષથી ભાડામાં કોઈ વધારો કરવામાં આવ્યો ન હતો. પરંતુ જૂન 2024માં CNGનો ભાવ ₹76.09 પ્રતિ કિલો હતો, જે જૂન 2026માં વધીને ₹88.02 પ્રતિ કિલો થયો છે. ઉપરાંત RTO ફી, વીમા પ્રીમિયમ અને વાહનોના સ્પેરપાર્ટ્સના ખર્ચમાં પણ નોંધપાત્ર વધારો થયો હોવાથી ભાડા વધારવાનો નિર્ણય લેવાયો છે.
નવા શૈક્ષણિક સત્રની શરૂઆત સાથે જ વાલીઓ પર યુનિફોર્મ, પુસ્તકો અને સ્કૂલ ફીની સાથે હવે ટ્રાન્સપોર્ટેશન ખર્ચનો પણ વધારાનો બોજ પડશે, જેના કારણે ખાસ કરીને મધ્યમવર્ગીય પરિવારોના માસિક બજેટ પર અસર થવાની સંભાવના છે.
સ્કૂલ રિક્ષાનું નવું માસિક ભાડું
- 1 કિમી – ₹850
- 2 કિમી – ₹950
- 3 કિમી – ₹1,050
- 4 કિમી – ₹1,150
- 5 કિમી – ₹1,250
(દર કિલોમીટરે ₹100નો વધારો)
સ્કૂલ વાનનું નવું માસિક ભાડું
- 1 કિમી – ₹1,400
- 2 કિમી – ₹1,600
- 3 કિમી – ₹1,800
- 4 કિમી – ₹2,000
- 5 કિમી – ₹2,200
(દર કિલોમીટરે ₹200નો વધારો)
અમદાવાદ સ્કૂલ વર્ધી એસોસિએશનના આ નિર્ણયથી હજારો વાલીઓને સીધી અસર થશે અને આગામી દિવસોમાં આ મુદ્દે વાલી મંડળો તથા શિક્ષણ ક્ષેત્રે ચર્ચા તેજ બનવાની શક્યતા છે.
Leave a Reply