સંસદનું બજેટ સત્ર આજથી શરૂ થઈ રહ્યું છે, જે આવનારા દિવસોમાં દેશની રાજકીય તથા આર્થિક દિશા નક્કી કરવામાં મહત્વપૂર્ણ ભૂમિકા ભજવશે. સત્રના પ્રથમ તબક્કાની શરૂઆત રાષ્ટ્રપતિ દ્રૌપદી મુર્મુના સંયુક્ત અભિભાષણથી થશે.
બજેટ સત્રનું સમયપત્રક
સંસદનું બજેટ સત્ર બે તબક્કામાં યોજાશે. પ્રથમ તબક્કો આજથી શરૂ થઈને 13 ફેબ્રુઆરી સુધી ચાલશે, જ્યારે બીજો તબક્કો 9 માર્ચથી શરૂ થઈ 2 એપ્રિલ સુધી ચાલશે. નોંધપાત્ર બાબત એ છે કે ઇતિહાસમાં પ્રથમ વખત 1 ફેબ્રુઆરી રવિવાર હોવા છતાં નાણામંત્રી નિર્મલા સીતારમણ કેન્દ્રીય બજેટ રજૂ કરશે.
વીબી-જીરામજી (VB-G RAM G) કાયદા પર વિવાદ
બજેટ સત્ર શરૂ થવા પૂર્વે યોજાયેલી સર્વદળીય બેઠકમાં સરકારે વિપક્ષની કેટલીક મહત્વપૂર્ણ માંગણીઓ નકારી દીધી છે. વિપક્ષ VB-G RAM G કાયદા પર ચર્ચાની માંગ કરી રહ્યો હતો. આ કાયદો મનરેગા (MGNREGA)ના સ્થાને અમલમાં આવ્યો છે, જેમાં ગ્રામીણ પરિવારોને 100 દિવસના બદલે 125 દિવસની રોજગારીની ગેરંટી આપવામાં આવે છે. સરકારનું કહેવું છે કે આ કાયદો શિયાળુ સત્ર દરમિયાન પસાર થઈ ચૂક્યો છે અને હાલમાં અમલમાં છે, તેથી તેના પર ફરી ચર્ચા શક્ય નથી.
SIR મુદ્દે પણ મતભેદ
બીજો મોટો વિવાદ મતદારી યાદીના વિશેષ સુધારણા એટલે કે SIR (Special Intensive Revision)ને લઈને છે. પશ્ચિમ બંગાળ અને આસામ જેવા રાજ્યોમાં મતદારોના નામ દૂર કરવાની પ્રક્રિયા અંગે વિપક્ષે શંકા વ્યક્ત કરી છે. જોકે, સંસદીય કાર્ય મંત્રી કિરેન રિજિજૂએ જણાવ્યું છે કે આ મુદ્દે અગાઉ ચર્ચા થઈ ચૂકી છે અને તેમણે વિપક્ષને સત્રને સુચારૂ રીતે ચલાવવામાં સહયોગ આપવા અપીલ કરી છે.
ચૂંટણીઓનો પડછાયો
આ બજેટ સત્ર એવા સમયમાં યોજાઈ રહ્યું છે જ્યારે પશ્ચિમ બંગાળ, આસામ, તમિલનાડુ અને કેરળ સહિત પાંચ રાજ્યોમાં વિધાનસભાની ચૂંટણીઓ યોજાવાની છે. આવી સ્થિતિમાં બજેટમાં થનારી જાહેરાતો તેમજ વિપક્ષનો અભિગમ, બંને રાજકીય રીતે અત્યંત મહત્વના માનવામાં આવી રહ્યા છે.
Leave a Reply