નવી દિલ્હીમાં લોકસભામાં કેન્દ્રીય બજેટ પર ચર્ચા દરમિયાન વિપક્ષના નેતા રાહુલ ગાંધીએ કેન્દ્ર સરકાર પર તીખા પ્રહાર કર્યા. તેમણે અમેરિકા સાથે થયેલી ટ્રેડ ડીલ, અદાણી ગ્રુપ સામે ચાલી રહેલા કેસ અને એપસ્ટીન ફાઇલના મુદ્દે સરકારને નિશાન બનાવી.
રાહુલ ગાંધીએ દાવો કર્યો કે અમેરિકાની સાથે થયેલી વેપાર સંધિ ભારત માટે નુકસાનકારક છે. તેમના મત મુજબ આ કરાર ભારતની ઊર્જા સુરક્ષા અને કૃષિ હિતોને અસર કરે છે. તેમણે કહ્યું કે દેશના ખેડૂતો અને યુવાનોના રોજગાર સાથે સમજૂતી કરવામાં આવી છે. આ પ્રકારની ડીલ કોઈ દબાણ વિના શક્ય નથી હોવાનું તેમણે સૂચવ્યું.
પ્રધાનમંત્રી નરેન્દ્ર મોદી પર આક્ષેપ કરતા રાહુલે જણાવ્યું કે તેમની કાર્યશૈલીમાં દબાણનો અણસાર દેખાય છે. એપસ્ટીનનો ઉલ્લેખ કરતા તેઓને સ્પીકરે અટકાવ્યા હતા. ત્યારબાદ તેમણે અદાણી ગ્રુપ અંગે વાત કરી અને કહ્યું કે કંપની સામે અમેરિકામાં કેસ ચાલી રહ્યો છે તેમજ સમન્સ જારી થયાં છે, છતાં ભારત સરકાર તરફથી સ્પષ્ટ જવાબ આપવામાં આવ્યો નથી. તેમના અનુસાર, સરકાર અદાણીના હિતોને ધ્યાનમાં રાખીને નિર્ણય લઈ રહી છે.
ટ્રેડ ડીલ અંગે તેમણે વધુમાં કહ્યું કે કૃષિ ક્ષેત્ર અમેરિકાને માટે ખુલ્લું મુકવામાં આવ્યું છે, જ્યારે ભારતની નીતિગત સ્વાયત્તતા પર અસર થઈ છે. તેમણે ટેરિફ વધારાના મુદ્દે પણ પ્રશ્નો ઉઠાવ્યા અને કહ્યું કે ભારત તરફથી મહત્વપૂર્ણ છૂટછાટ આપવામાં આવી છે.
સોશિયલ મીડિયા પ્લેટફોર્મ ‘X’ પર પણ રાહુલ ગાંધીએ સમાન આક્ષેપો કર્યા. તેમના જણાવ્યા મુજબ, દેશના હિતોને જોખમમાં મૂકી સત્તા જાળવવા માટે સમજૂતી કરવામાં આવી છે. સમગ્ર મુદ્દે તેમણે સરકાર પાસેથી સ્પષ્ટતા માંગતા કહ્યું કે આ કરાર દેશના ભવિષ્ય માટે ગંભીર પરિણામો લાવી શકે છે.
Leave a Reply