અમદાવાદના કાલુપુર બ્રિજ નજીક વહેલી સવારે આગની એક મોટી ઘટના સામે આવી છે. શહેર કોટડા પોલીસ સ્ટેશન સામે આવેલા સેવ બનાવવાના કારખાનામાં ભીષણ આગ લાગતા વિસ્તારમાં અફરાતફરી મચી ગઈ હતી. ઘટનાની જાણ થતાં જ ફાયર બ્રિગેડનો મોટો કાફલો તાત્કાલિક ઘટનાસ્થળે પહોંચી ગયો હતો.
વહેલી સવારે લાગેલી આગ
આજે વહેલી સવારે આશરે 2:23 વાગ્યે કાલુપુર બ્રિજના છેડે અને શહેર કોટડા પોલીસ સ્ટેશનની સામે આવેલા સેવ બનાવવાના કારખાનામાંથી આગ લાગ્યાનો ‘અંગાર કોલ’ મળ્યો હતો. કારખાનામાં રહેલા જ્વલનશીલ પદાર્થો અને તેલના જથ્થાને કારણે આગ થોડા જ સમયમાં વિકરાળ સ્વરૂપ ધારણ કરી ગઈ હતી.
ફાયર બ્રિગેડનું મેગા ઓપરેશન
આગની ગંભીરતાને ધ્યાનમાં રાખીને શહેરના વિવિધ ફાયર સ્ટેશનોમાંથી તાત્કાલિક મદદ મંગાવવામાં આવી હતી. જેમાં નીચે મુજબના વાહનો અને અધિકારીઓને કામગીરી માટે મોકલવામાં આવ્યા હતા.
- ગોમતીપુર ફાયર સ્ટેશનમાંથી મિની ફાઈટર અને બાઉઝર
- પાંચકુવા ફાયર સ્ટેશનમાંથી મિની ફાઈટર
- નરોડા ફાયર સ્ટેશનમાંથી બે ‘ગજરાજ’ વોટર ટેન્કર
- મણિનગર ફાયર સ્ટેશનમાંથી એક ગજરાજ સાથે STO અને SO અધિકારીઓ
- થલતેજ ફાયર સ્ટેશનમાંથી DO બારિયા સાહેબના માર્ગદર્શન હેઠળ કામગીરી
હાલની પરિસ્થિતિ
ફાયર બ્રિગેડના જવાનો ચારેબાજુથી પાણીનો મારો ચલાવી આગ પર કાબૂ મેળવવાના પ્રયાસો કરી રહ્યા છે. સદનસીબે અત્યાર સુધી કોઈ જાનહાનિ થયાની માહિતી મળી નથી. જોકે કારખાનામાં રહેલો મોટો જથ્થો બળીને ખાખ થયો હોવાની આશંકા વ્યક્ત કરવામાં આવી રહી છે. આગ લાગવાનું પ્રાથમિક કારણ હજુ સુધી સ્પષ્ટ થયું નથી.
Leave a Reply