પાર્ટી પ્લોટ ગરબાના 40 વર્ષ: રૂ.12ની ટિકિટથી રૂ.1,200+, આયોજન ખર્ચ રૂ.50 હજારથી વધીને રૂ.50 લાખ સુધી
0 
0 
અમદાવાદમાં પાર્ટી પ્લોટના ગરબાની પરંપરા વર્ષ 2026માં 40 વર્ષ પૂર્ણ કરી રહી છે. 1986માં પાલડીથી શરૂ થયેલી આ પરંપરામાં સમય સાથે મોટો બદલાવ આવ્યો છે. એક સમયે માત્ર રૂ.12માં મળતી ગરબાની ટિકિટ હવે રૂ.1,200 કે તેથી વધુ થઈ ગઈ છે, જ્યારે 10 દિવસના આયોજનનો ખર્ચ રૂ.50 હજારથી વધીને રૂ.50 લાખ કે તેથી વધુ સુધી પહોંચી ગયો છે.
1986માં રૂ.12ની ટિકિટથી શરૂઆત
અમદાવાદમાં પાર્ટી પ્લોટમાં વ્યાવસાયિક ધોરણે ગરબાનું આયોજન 1986માં પાલડી વિસ્તારમાં શરૂ થયું હોવાનું જાણવા મળે છે. તે સમયે રૂ.12ની ટિકિટ રાખવામાં આવતી હતી અને ગરબામાં મર્યાદિત સંખ્યામાં લોકો ભાગ લેતા હતા. શેરી અને પોળના પરંપરાગત ગરબાથી અલગ રીતે સ્ત્રી-પુરુષો સાથે મળીને ગરબા રમી શકે તેવો આ નવો પ્રકાર ઝડપથી લોકપ્રિય બન્યો.
1996 બાદ વધ્યું પ્રોફેશનલ આયોજન
લગભગ એક દાયકા બાદ, 1996થી પાર્ટી પ્લોટના ગરબામાં વ્યાવસાયિક આયોજનનો વ્યાપ વધ્યો. 132 ફૂટ રોડ નજીક નહેરૂનગર વિસ્તારમાં યોજાયેલા ગરબામાં સાઉન્ડ સિસ્ટમ, લાઇટિંગ અને વીજળી માટે વૈકલ્પિક જનરેટર જેવી સુવિધાઓ ઉમેરવામાં આવી હતી. ખેલૈયાઓને ધૂળથી બચાવવા માટે ગ્રાઉન્ડ પર જાજમ પાથરવાની વ્યવસ્થા પણ કરવામાં આવી હતી.
સરકારી પ્રોત્સાહનથી ગરબાનો વ્યાપ વધ્યો
1996 પછી અમદાવાદમાં પાર્ટી પ્લોટના ગરબાનો ટ્રેન્ડ સતત વધતો ગયો. વર્ષ 2003થી ગુજરાત સરકારે ‘વાયબ્રન્ટ નવરાત્રી મહોત્સવ’ શરૂ કર્યો, જેના કારણે રાજ્યમાં વ્યાવસાયિક રીતે નવરાત્રી ઉજવવાનો વ્યાપ વધુ વધ્યો. આજે ખાનગી હોય કે સરકારી, મોટા ગરબા આયોજનોમાં આયોજન, સુરક્ષા, લાઇટિંગ, સાઉન્ડ અને અન્ય સુવિધાઓમાં વ્યાવસાયિકતા જોવા મળે છે.
દાંડિયા રાસથી આધુનિક ડ્રેસ કોડ સુધી
શરૂઆતના વર્ષોમાં પાર્ટી પ્લોટના ગરબાને ‘દાંડિયા રાસ’ તરીકે ઓળખવામાં આવતા હતા અને કોઈ ખાસ ડ્રેસ કોડ નહોતો. યુવતીઓ સામાન્ય રીતે સાડી અથવા ચણિયા-ચોળીમાં જોવા મળતી, જ્યારે મોટાભાગના યુવકો પેન્ટ-શર્ટમાં જ ગરબા રમતા. સમય જતાં પરંપરાગત કેડિયા, ચોરણી અને ચણિયા-ચોળી જેવા વસ્ત્રોનો ક્રેઝ વધ્યો અને આજના સમયમાં ગરબાના ડ્રેસ અને લુક પણ આયોજનનો મહત્વનો ભાગ બની ગયા છે.
ગેટ પરની ટિકિટથી ઓનલાઈન બુકિંગ સુધી
એક સમય હતો જ્યારે ગરબાની ટિકિટો પાર્ટી પ્લોટના ગેટ અથવા આસપાસની નિશ્ચિત દુકાનો પરથી મળતી હતી. હવે ટિકિટિંગ સંપૂર્ણપણે ડિજિટલ બન્યું છે. એક વ્યક્તિ આખા ગ્રુપની ટિકિટ ઓનલાઈન બુક કરીને અન્ય સભ્યોને તેમની ટિકિટ ડિજિટલ રીતે મોકલી શકે છે. આ સુવિધાએ ખાસ કરીને યુવા વર્ગમાં પાર્ટી પ્લોટના ગરબાની લોકપ્રિયતા વધારી છે.
અમદાવાદના વિસ્તરણ સાથે ગરબાનો પણ વિસ્તાર
અમદાવાદ શહેરના વિકાસ સાથે પાર્ટી પ્લોટના ગરબાનું વિસ્તરણ પણ જોવા મળ્યું છે. 1950માં શહેરની હદ 54.72 ચોરસ કિમી હતી, જે 1965માં 93 ચોરસ કિમી થઈ હતી. 1986માં શહેરની હદ વધીને 160.86 ચોરસ કિમી થઈ અને તે જ સમયગાળામાં પશ્ચિમ અમદાવાદમાં પાર્ટી પ્લોટ ગરબાની શરૂઆત થઈ.
2006-07માં શહેરની હદ 464 ચોરસ કિમી સુધી વિસ્તરી અને 132 ફૂટ રોડ તથા આસપાસના વિસ્તારોમાં ગરબાનો વ્યાપ વધ્યો. 2020-21માં રિંગ રોડની આસપાસના વિસ્તારોનો સમાવેશ થતાં શહેરની હદ 505 ચોરસ કિમી સુધી પહોંચી. શહેરના નવા વિસ્તારો વિકસતા ગયા તેમ પાર્ટી પ્લોટના ગરબા પણ નવા વિસ્તારો સુધી પહોંચતા ગયા.
આ રીતે 1986થી 2026 સુધીના ચાર દાયકામાં અમદાવાદના પાર્ટી પ્લોટ ગરબાએ રૂ.12ની ટિકિટ અને મર્યાદિત આયોજનથી શરૂ થઈને રૂ.1,200થી વધુની ટિકિટ અને કરોડો રૂપિયાના વ્યાપારી ઇકોસિસ્ટમ સુધીની સફર કરી છે.
