ICC Men’s T20 World Cup 2026ના સુપર-8 તબક્કામાં ભારતે શાનદાર પ્રદર્શન સાથે ઝિમ્બાબ્વેને 72 રને હરાવી ઇતિહાસ રચ્યો. આ નિર્ણાયક મુકાબલામાં ભારતીય બેટ્સમેનોની આક્રમક બેટિંગના બળ પર ટીમે 20 ઓવરમાં 4 વિકેટે 256 રનનો વિશાળ સ્કોર ઉભો કર્યો, જે ટી20 વર્લ્ડકપમાં ભારતનો અત્યાર સુધીનો સર્વોચ્ચ સ્કોર છે. આ જીત સાથે ભારતે સેમિફાઇનલ માટેની પોતાની આશાઓ મજબૂત બનાવી અને પોઈન્ટ ટેબલમાં સ્થિતિ સુધારી.
ભારતીય બેટિંગનો ધમાકો
ભારત તરફથી સંજુ સેમસને 15 બોલમાં 24 રન કર્યા. અભિષેક શર્માએ 30 બોલમાં 55 રનની તોફાની ઇનિંગ રમી, જેમાં 4 ચોગ્ગા અને 4 છગ્ગા સામેલ હતા. ઈશાન કિશને 38 રનનું મહત્વપૂર્ણ યોગદાન આપ્યું, જ્યારે સૂર્યકુમાર યાદવે માત્ર 13 બોલમાં 33 રન ફટકારી ગતિ વધારી. હાર્દિક પંડ્યાએ 23 બોલમાં અણનમ 50 રન બનાવ્યા અને તિલક વર્માએ 16 બોલમાં અણનમ 44 રન ઉમેરી અંતિમ ઓવરોમાં સ્કોરને 256 સુધી પહોંચાડ્યો.
ઝિમ્બાબ્વેની બોલિંગ
ઝિમ્બાબ્વે તરફથી રિચાર્ડ નગારાવા, બ્લેસિંગ મુઝારાબાની, ટિનોટેન્ડા માપોસા અને સિકંદર રઝાએ 1-1 વિકેટ ઝડપી. નગારાવા 4 ઓવરમાં 62 રન આપી સૌથી મોંઘા સાબિત થયા, જ્યારે બ્રેડ ઇવાન્સે 52 રન ખર્ચ્યા.
બેનેટની જંગી ઇનિંગ
લક્ષ્યાંકનો પીછો કરતાં ઝિમ્બાબ્વે માટે બ્રાયન બેનેટે 59 બોલમાં 97 રનની શાનદાર ઇનિંગ રમી, પરંતુ સદીથી વંચિત રહ્યો. સિકંદર રઝાએ 31 રન બનાવ્યા, જ્યારે અન્ય બેટ્સમેનો ખાસ યોગદાન આપી શક્યા નહોતા અને ટીમ નિર્ધારિત ઓવરોમાં લક્ષ્યાંક સુધી પહોંચી શકી નહીં.
ભારતીય બોલિંગમાં અર્શદીપ ચમક્યો
ભારત તરફથી અર્શદીપ સિંહે 3 વિકેટ લઈને ઝિમ્બાબ્વેની કમર તોડી. વરુણ ચક્રવર્તી, અક્ષર પટેલ અને શિવમ દુબેએ 1-1 વિકેટ ઝડપી.
બે મોટા રેકોર્ડ
- ભારતે ટી20 વર્લ્ડકપના ઈતિહાસમાં પોતાનો સર્વોચ્ચ સ્કોર નોંધાવ્યો. અગાઉ 2007માં ઈંગ્લેન્ડ સામે 218 રન સર્વોચ્ચ હતા, જે હવે તૂટ્યો.
- આ ટૂર્નામેન્ટમાં પણ ભારતનો આ સૌથી મોટો સ્કોર રહ્યો.
આ જીત બાદ ભારત 2 પોઈન્ટ સાથે ટેબલમાં ત્રીજા સ્થાને પહોંચ્યું છે અને નેટ રન રેટમાં પણ નોંધપાત્ર સુધારો થયો છે. ઝિમ્બાબ્વે સેમિફાઇનલની રેસમાંથી બહાર થઈ ગયું છે, જ્યારે ભારત માટે હવે વેસ્ટ ઈન્ડિઝ સામેની મેચ ‘કરો કે મરો’ સાબિત થશે.
Leave a Reply