કેન્દ્ર સરકારના બજેટમાં ગુજરાત સહિતના વિવિધ રાજ્યોની પોલીસ વ્યવસ્થાને વધુ આધુનિક અને સશક્ત બનાવવા માટે 4,061 કરોડ રૂપિયાનું ખાસ અનુદાન ફાળવવાનો નિર્ણય લેવામાં આવ્યો છે. આ ફાળવણીનો મુખ્ય ઉદ્દેશ પાકિસ્તાનને લાગતી જળ તથા જમીન સરહદે સુરક્ષા વ્યવસ્થા વધુ મજબૂત કરવાનો છે. સાથે સાથે એન્ટી નાર્કોટિક્સ ટાસ્ક ફોર્સ અને ફોરેન્સિક સાયન્સ લેબોરેટરી (FSL)ને આધુનિક સાધનો અને ટેકનોલોજીથી સજ્જ કરવા પર પણ વિશેષ ખર્ચ કરવામાં આવશે.
આંતરિક સુરક્ષા માટે મોટું રોકાણ
કેન્દ્રના ગૃહ વિભાગ માટે કુલ 1.73 લાખ કરોડ રૂપિયાનું બજેટ નક્કી કરવામાં આવ્યું છે. તેમાંના મોટા હિસ્સાથી ગુજરાત પોલીસ તેમજ સરહદી સુરક્ષા સંભાળતી એજન્સીઓને આધુનિક બનાવવા પર ભાર મૂકવામાં આવ્યો છે. આંતરિક સુરક્ષા મજબૂત કરવા અને સરહદી વિસ્તારોમાં હાઈ-ટેક સર્વેલન્સ સિસ્ટમ વિસ્તૃત કરવા માટે પણ અલગથી ફાળવણી કરાઈ છે.
ક્રાઈમ ટ્રેકિંગ માટે દોઢગણું બજેટ
ગુજરાત સહિતના રાજ્યોમાં ગુનાખોરી સામે વધુ અસરકારક રીતે કાર્યવાહી કરી શકાય તે માટે ક્રાઈમ ટ્રેકિંગ સિસ્ટમ અને સંબંધિત ઈન્ફ્રાસ્ટ્રક્ચરને મજબૂત બનાવવા 4,061 કરોડ રૂપિયા ફાળવાયા છે. આ રકમથી સીસીટીવી નેટવર્ક, આધુનિક ટેકનોલોજી અને સંકલિત માહિતી વ્યવસ્થાઓ વિકસાવવામાં આવશે. ખાસ વાત એ છે કે ગયા વર્ષના બજેટની તુલનામાં આ ફાળવણી દોઢગણી કરવામાં આવી છે.
સરહદી સુરક્ષાને પ્રાથમિકતા
ગુજરાત-પાકિસ્તાનની જળ અને જમીન સરહદે સુરક્ષા વધુ મજબૂત કરવા માટે 5,266 કરોડ રૂપિયાનું વિશેષ અનુદાન જાહેર કરવામાં આવ્યું છે. આ નાણાંથી સરહદ પર ફેન્સિંગ, વોચ ટાવર્સ અને અદ્યતન સર્વેલન્સ સિસ્ટમ વિકસાવવામાં આવશે. આધુનિક સુરક્ષા સાધનોના ઉપયોગથી ગુજરાતની દરિયાઈ અને જળસીમાની સુરક્ષા વધુ કડક બનાવાશે.
આ સાથે, ગુજરાતના ઈકોનોમિક કોરિડોર અને દેશની સુરક્ષા વ્યવસ્થાને ધ્યાનમાં રાખીને નેશનલ ફોરેન્સિક સાયન્સ યુનિવર્સિટી સહિત સમગ્ર દેશમાં આંતરરાજ્ય સંકલિત ક્રિમિનલ જસ્ટિસ સિસ્ટમને વધુ મજબૂત બનાવવા માટે પણ આ બજેટનો ઉપયોગ કરવામાં આવશે.
Leave a Reply