અમદાવાદના મણિનગર વિસ્તારમાં આવેલી દુર્ગા વિદ્યાલયમાંથી એક ચિંતાજનક ઘટના સામે આવી છે. ધોરણ-6માં અભ્યાસ કરતા બે વિદ્યાર્થીઓ વચ્ચે થયેલી સામાન્ય બોલાચાલીએ અણધાર્યો અને ગંભીર વળાંક લીધો હતો. વિવાદ બાદ એક વિદ્યાર્થીએ બીજા વિદ્યાર્થીની પાણીની બોટલમાં કથિત રીતે લુગ્દી અને ડામર ભેળવી દીધું હોવાનું સામે આવ્યું છે.
આ મિશ્રિત પાણી પીતા જ વિદ્યાર્થીની તબિયત બગડી હતી અને તેને ઉલટીઓ થવા લાગી હતી. ઘટનાની જાણ થતાં શાળા સંચાલન દ્વારા તરત કાર્યવાહી કરવામાં આવી અને CCTV ફૂટેજ તપાસવામાં આવ્યું. તેમાં એક વિદ્યાર્થી છુપાઈને બીજા વિદ્યાર્થીની બેગ પાસે જઈ તેની બોટલમાં કંઈક ભેળવતો દેખાયો હતો. સદનસીબે બાળકને કોઈ ગંભીર શારીરિક નુકસાન થયું નથી, પરંતુ જો તેમાં કોઈ ઝેરી પદાર્થ હોત તો પરિસ્થિતિ વધુ ભયાનક બની શકી હોત.
ઘટનાની ગંભીરતા ધ્યાનમાં રાખીને જિલ્લા શિક્ષણાધિકારી રોહિત ચૌધરીએ બંને વિદ્યાર્થીઓના વાલીઓને બોલાવી સમજાવટ આપી હતી. તકેદારીરૂપે બંને વિદ્યાર્થીઓના સેક્શન પણ બદલવામાં આવ્યા છે. નાની ઉંમરે આવી પ્રકારની બદલો લેવાની માનસિકતા સામે આવતાં શિક્ષણ જગત સાથે-साथ વાલીઓમાં પણ ચિંતા ફેલાઈ છે. બાળકોમાં વધતી હિંસક પ્રવૃત્તિઓ અંગે આ ઘટના એક ચેતવણી સમાન બની છે.
Leave a Reply