અમદાવાદમાં એક દુઃખદ અને હૃદયદ્રાવક અકસ્માતની ઘટના સામે આવી છે. રાણીપ વિસ્તારના બલોલનગર બ્રિજ પર એક્ટિવા પર જઈ રહેલા દંપતીને એક બેફામ ઝડપે દોડતી કારએ ટક્કર મારતાં ભયાનક અકસ્માત સર્જાયો હતો. ટક્કર બાદ દંપતી બ્રિજ પરથી નીચે પટકાયું, જેમાં બંનેના કરુણ મોત થયા.
મોડી રાતે સર્જાયો અકસ્માત
પ્રાપ્ત માહિતી મુજબ શુક્રવારે રાત્રે આ ઘટના બની હતી. બલોલનગર બ્રિજ પરથી એક્ટિવા પર પસાર થઈ રહેલા દંપતીને પાછળથી આવી રહેલી એક અજાણી કારએ જોરદાર ટક્કર મારી હતી. અકસ્માત એટલો ગંભીર હતો કે યુવક સ્થળ પર જ બ્રિજ પરથી નીચે પટકાઈ ગયો અને ત્યાં જ તેનું મોત નીપજ્યું. ગંભીર રીતે ઈજાગ્રસ્ત પત્નીને તાત્કાલિક હોસ્પિટલ ખસેડવામાં આવી હતી, જ્યાં સારવાર દરમિયાન તેમનું પણ અવસાન થયું.
મૃતકોની ઓળખ
રાત્રે આશરે 11:30 વાગ્યે 28 વર્ષીય કિશન સુનીલભાઈ વાછેટા તેમની પત્ની કોમલબેન સાથે એક્ટિવા પર જઈ રહ્યા હતા. આ દરમિયાન પાછળથી પૂરપાટ ઝડપે આવતી કારએ તેમને ટક્કર મારી હતી. ઘટનાને પગલે બંનેના જીવનનો અંત આવી ગયો.
સુરક્ષા વ્યવસ્થાને લઈને ઉઠેલા સવાલો
આ ઘટનાએ શહેરના બ્રિજોની સુરક્ષા વ્યવસ્થા પર પ્રશ્નચિહ્ન ઉભું કર્યું છે. મૃતકના મિત્ર અપૂર્વ પરમારે તંત્ર સામે નારાજગી વ્યક્ત કરતાં જણાવ્યું હતું કે જો બ્રિજ પર યોગ્ય સાઈડ રેલિંગ અથવા સેફ્ટી બેરિયર હોત, તો કદાચ આવી દુર્ઘટના ટાળી શકાય હોત. તેમણે એ પણ આક્ષેપ કર્યો હતો કે બ્રિજ પર લગાવવામાં આવેલા CCTV કેમેરા કાર્યરત ન હોવાના કારણે આરોપીની ઓળખ કરવામાં અડચણ પડી રહી છે.
પોલીસ તપાસ શરૂ
રાણીપ પોલીસે હિટ એન્ડ રનની આ ઘટનામાં ગુનો નોંધી તપાસ શરૂ કરી છે. ટ્રાફિક પોલીસની ‘L’ ડિવિઝન ટીમ તથા એક્સિડન્ટ રિસર્ચ ટીમે ઘટનાસ્થળની મુલાકાત લઈ પુરાવા એકત્ર કર્યા છે. પોલીસ દ્વારા રેશ ડ્રાઈવિંગ અને બેદરકારીથી મોત નિપજાવવાના ગુનાઓ હેઠળ ફરાર કારચાલકની શોધખોળ તેજ કરવામાં આવી છે.
સ્થાનિકોની માંગ
સીવિલ હોસ્પિટલમાં સારવાર દરમિયાન કોમલબેનનું પણ મોત થતાં પરિવાર પર દુઃખનો પહાડ તૂટી પડ્યો છે. આ ઘટનાના પગલે સ્થાનિકોએ બલોલનગર બ્રિજ પર તાત્કાલિક સેફ્ટી રેલિંગ અને મજબૂત સુરક્ષા વ્યવસ્થા ઉભી કરવાની માંગ ઉઠાવી છે.
Leave a Reply